Jańa oqý jyly: 500 myń balaǵa 22 mlrd teńgeden astam qarajat bólindi
ASTANA. KAZINFORM — Búgin Úkimet otyrysynda Premer-Mınıstr Oljas Bektenov mektep ashanalary joq óńirlerdi atady.
«Balalardy 1-synypqa qabyldaý máselesine erekshe toqtalǵym keledi. Qazir bul protsess belsendi júrip jatyr. Ony durys uıymdastyrý kerek. Balabaqshaǵa barmaǵan bolashaq birinshi synyp oqýshylaryna kóbirek kóńil bólgen jón. Sondyqtan balabaqshalar janyndaǵy konsýltatsııalyq pýnktterdiń qyzmetin jandandyrý qajet. Balalardyń mektepke daıyndalýyna barynsha kómektesý kerek», - dedi O.Bektenov.
Úkimet basshysynyń aıtýynsha, jańa oqý jyly qarsańynda memlekettik qoldaýǵa muqtaj balalarǵa materıaldyq jáne áleýmettik kómek kórsetilýi tıis.
«Bıyl 500 myńnan astam bala úshin 22 mlrd teńgeden astam bıýdjet qarajaty kózdelgen. Ákimdikter mektep formasy men kerek-jaraqtardy satyp alý úshin qarajattyń ata-analarǵa ýaqytyly jiberilýin qamtamasyz etsin. Taǵy bir mańyzdy baǵyt – mekteptegi tamaqtanýdy uıymdastyrý jáne onyń sapasy. 1 qyrkúıekten bastap 1,7 mln-nan astam oqýshyny tegin tamaqtandyrý josparlanǵan. Alaıda, Atyraý, Túrkistan, Jambyl oblystarynyń birqatar mektebinde ashana joq. Osy óńirlerdiń ákimdikteri tamaqtaný sapasyn jáne sanıtarııalyq-epıdemıologııalyq qaýipsizdiktiń qamtamasyz etilýin erekshe baqylaýǵa alsyn. Ǵanı Bektaıuly (Oqý-aǵartý mınıstri), barlyq oqýshylardyń 1 qyrkúıekke qaraı oqýlyqtardyń tolyq jıyntyǵyn alýyn da baqylaýda ustańyz. Bizdiń basty mindetimiz – balalardyń sapaly, zamanaýı bilim alýyn qamtamasyz etý. Mektepterdiń, kolledjder men joǵary oqý oryndarynyń jumysyn joǵary básekelik deńgeıge shyǵarý kerek», - dedi Premer-Mınıstr.
Onyń sózine qaraǵanda, mektepter men kolledjderdiń jáne joǵary oqý oryndarynyń bazasynda stýdentter men oqytýshylardyń jetekshiligimen oqýshylar ózderiniń bolashaq ınjenerlik ıdeıalaryn júzege asyra alatyn, ártúrli buıymdar men bólshekter qurastyryp, daıyndaýdy úırenetin jalpyǵa birdeı qoljetimdi úıirmeler, tehnıkalyq shyǵarmashylyq ortalyqtaryn qurý kerek. Bilim berýdiń barlyq satylarynda sapa boıynsha jańa talaptar belgilenýi qajet.
«Orta bilim berý salasynda jaıly mektepter damýǵa yqpal etetin negizgi standart bolýǵa tıis. Basqa mektepterdi olardyń deńgeıine beıimdep renovatsııalaý qajet», - dedi O.Bektenov.
