Jańa oblystardyń qurylýy óńirlerdiń damýyna oń áser etedi - Janna Kárimova
Mundaı pikirdi QR Prezıdenti janyndaǵy Qazaqstan strategııalyq zertteýler ınstıtýtynyń áleýmettanýlyq zertteýler bóliminiń meńgerýshisi Janna Kárimova bildirdi.
«Parlament palatalarynyń birlesken otyrysynda Qazaqstan Respýblıkasynyń Prezıdenti Qasym-Jomart Toqaev jańa ákimshilik-aýmaqtyq qurylymdardy jarııalady. Osylaısha, qazirgi Shyǵys Qazaqstan oblysy aýmaǵynyń bir bóliginiń ortalyǵy Semeı qalasynda bolatyn Abaı oblysyna biriktiriledi. Qazirgi Qaraǵandy oblysynyń aýmaǵynda ortalyǵy Jezqazǵan qalasy bolatyn Ulytaý oblysy qurylady. Almaty oblysy eki derbes ákimshilik-aýmaqtyq birlikke – ortalyǵy Taldyqorǵan qalasynda ornalasqan Jetisý oblysy jáne ortalyǵy Qapshaǵaı qalasy bolatyn Almaty oblysyna bólinedi», -deıdi spıker.
Aıtýynsha, mundaı qaıta qurýlardyń tarıhı jáne belgili bir dárejede qasıetti mánimen qatar, jańa aımaqtardyń qalyptasýy óńirlik damýǵa oń áserin tıgizýge de áleýeti bar.
«Barshamyz biletindeı, Qaraǵandy oblysynyń qazirgi Ulytaý aýdanynyń aýmaǵynda 2 monoqala – Jezqazǵan jáne Sátbaev ornalasqan. Oblys ortalyǵyna aınalýy tıis Jezqazǵan qalasynda 2015-2020 jyldar aralyǵynda halyqtyń tabıǵı ósiminiń tómendeýi, kóshi-qon shyǵynynyń artýy baıqaldy. Sonymen qatar, 2016 jyldan 2018 jylǵa deıin ajyrasý sanynyń bir mezgilde ósýimen nekege turý sanynyń aıtarlyqtaı tómendeýi baıqaldy. Eldiń monoqalalarynda orta eseppen nekelerdiń 50%-ǵa jýyǵy ajyrasýmen aıaqtalady. Al bul jerde ajyrasýǵa áleýmettik-ekonomıkalyq faktordyń yqpalyn joqqa shyǵarýǵa bolmaıdy. Qalanyń oblys ortalyǵyna aınalýy Jezqazǵan qalasynyń áleýmettik-ekonomıkalyq damýyna, turǵyndarynyń ómir súrý sapasyn arttyrýǵa oń áserin tıgizýi múmkin. Sátbaev qalasynyń da damýyna serpin berýi kerek»,- deıdi spıker.
Sonymen qatar, ol Qaraǵandy oblysy aýmaǵy jaǵynan respýblıkadaǵy eń úlken aımaq ekenin tilge tıek etti. Eldi mekender arasyndaǵy qashyqtyqtyń úlken bolýy, árıne, aımaqty basqarýdy qıyndatady.
«Qazirgi Almaty oblysynyń sheginde qaıta bólý halyq sany men tyǵyzdyǵy boıynsha aýmaqtardy teńestiredi. Bul óńirler turǵyndaryn bilim, densaýlyq saqtaý jáne mádenıet salalaryndaǵy bazalyq ıgiliktermen qamtamasyz etý deńgeıine oń áser etýi tıis. Búgingi tańda bul salalardaǵy dısproportsııalar aıtarlyqtaı mańyzdy. Máselen, óńirler jaǵdaıynda 1 jastan 3 jasqa deıingi balalardy balabaqshamen qamtý Almaty qalasynda 13,9%-dan Túrkistan oblysynda 68,0%-ǵa deıin aýytqıdy. 10 myń adamǵa shaqqandaǵy barlyq mamandyqtaǵy dárigerler sany boıynsha óńirler turǵysyndaǵy eń joǵary jáne eń tómengi mánder arasyndaǵy aıyrmashylyq 3,3 ese, aýrýhanalyq tósek sany boıynsha – 2 ese. Aýrýhanalar sanyndaǵy aıyrmashylyq 1 myń adamǵa shaqqanda 2,9 esege, teatrlar boıynsha – 9 esege deıin jetedi»,- dedi QR Prezıdenti janyndaǵy Qazaqstan strategııalyq zertteýler ınstıtýtynyń áleýmettanýlyq zertteýler bóliminiń meńgerýshisi Janna Kárimova.
