Jańa oblystardyń bıýdjeti qalaı qalyptasady – mınıstrdiń jaýaby

NUR-SULTAN. QazAqparat – QR Ulttyq ekonomıka mınıstri Álibek Qýantyrov jańadan qurylatyn oblystardyń bıýdjeti qalaı qalyptasatynyn aıtty, dep habarlaıdy QazAqparat tilshisi.

«Prezıdent birinshi jartyjyldyqtyń aıaǵyna deıin oryndaý úshin aıqyn tapyrma berdi. Qazir uıymdastyrý sharalary júrip jatyr. Áreketter algorıtmi pysyqtaldy. Qaıta qurýǵa túsetin oblystardyń ókilderi qazir Ulttyq ekonomıka mınıstrliginde júr. Olardyń toptary bizdiń toptarmen birge jumys isteýde. Aýmaqtyq bólinis máselesin sheship jatyrmyz. Bul másele qosymsha talqylanyp, Prezıdenttiń tıisti Jarlyǵy ázirlenedi. Negizgi uıymdastyrý jumystaryn jyldyń birinshi jartysyna deıin aıaqtaý josparlanyp otyr, Jalpy alǵanda, osy merzimde Jarlyqtardyń jobasy ázirlenip, Prezıdenttiń sheshimi shyǵarylady», - dedi mınıstr Úkimet otyrysynan keıin BAQ ókilderine bergen suhbatynda.

Vedomstvo basshysynyń aıtýynsha, qazir jańa oblystardy qurýǵa qajet qarajat eseptelip jatyr.

«Qajetti aqsha kólemi qazir eseptelip jatyr. Bizde oǵan qajetti rezerv bar. Qazirgi bıýdjettiń kólemine syıǵyzýǵa tyrysamyz. Biraq qajet bolsa, qosymsha aqsha bólinedi. Óıtkeni jańa ákimshilik-aýmaqtyq birlikter paıda bolady. Ákimdikter, aýdandar qurylyp, shtattar sany bekitiledi. Onyń bárine rezervimiz bar. Ortalyqtyń, naqty aıtqanda Memleket basshysynyń bastamasy bolǵandyqtan, qajet bolsa respýblıkalyq bıýdjetten qosymsha aqsha bólinedi», - dedi Álibek Qýantyrov.