Jańa ÓBK boıynsha munaı kompanııalarymen kelissózderdi bastadyq — Oljas Bektenov

ASTANA. KAZINFORM — Premer-mınıstr Oljas Bektenov Úkimette ótken baspasóz máslıhatynda iri ken oryndarynyń ónimin bólý kelisimin qaıta qaraý boıynsha jańa kelissózder bastalǵanyn aıtyp, osyǵan qatysty pikirin bildirdi.

Premerdiń aıtýynsha, respýblıkalyq bıýdjetke túsetin barlyq salyq túsimderiniń 70 paıyzy iri bıznesten túsedi, bul shamamen 15 trln teńgeni quraıdy. Sonyń 6,5 trln teńgeden astamy iri munaı jobalary boıynsha tólenedi.

— Іri munaı jobalary qandaı sharttarmen ıgerilip jatqanyna kelsek, Ónimdi bólý týraly kelisimde rasynda da el múddesi eleýli deńgeıde shektelgen degen pikir bar. Qazirgi tańda biz konsortsıým aıasyndaǵy áriptesterimizben jańa kezeńge arnalǵan jańa ÓBK (Ónimdi bólý kelisimi) jasasý boıynsha kelissózder júrgize bastadyq. Árıne, munda elimizdiń ulttyq múddesin qorǵaıtyn bolamyz. Biraq bul qandaı da bir kelisimsharttardy dóreki túrde qaıta qaraýdy bildirmeıdi, sebebi bul óte názik ári ınvestıtsııalyq ahýalǵa aıtarlyqtaı áser etetin máseleler. Sondyqtan biz bul jumysty baıyppen, eshqandaı kúrt árekettersiz, máseleni ýshyqtyrmaı júrgizemiz. Bul qalypty kelissóz protsesi. Jańa aıtqanymdaı, biz elimizdiń ulttyq múddelerine basymdyq beremiz, — dedi O. Bektenov.

Eske sala ketsek, Prezıdent Qasym-Jomart Toqaev Úkimettiń keńeıtilgen otyrysynda iri ken oryndarynyń ónimin bólý jónindegi kelisimdi tıimdi ári jańa sharttarmen uzartý úshin kelissózderdi jandandyrýdy tapsyrǵan edi.

Buǵan deıin Májilis depýtaty Edil Jańbyrshın ÓBK qaıta qaraý ne úshin mańyzdy ekenin túsindirip berdi.