Jańa nysandar salý úshin Myńjyldyq alleıasyndaǵy barlyq saıajaıdy buzamyz - ákim
NUR-SULTAN. QazAqparat - Elordanyń ákimi Baqyt Sultanov qurylys jumystarynyń tómendeýine sebep bolǵan máselelerdi atady, dep xabarlaıdy QazAqparat tilshisi.
Ákimniń aıtýynsha, jyl basynan beri 495 myń sharshy metr turǵyn úı paıdalanýǵa berildi. Byltyr osy ýaqytta 763 myń sharshy metr salynǵan.
«Bunyń biraz obektıvti sebepteri bar. Sebebi ótken jyldary qurylysshylar óz nysandaryn bos jerlerde salǵan bolatyn. Qazir jerdi saıajaılardan bosatý jáne taǵy basqa jumystar kóp. Bıyl Myńjyldyq alleıasyndaǵy barlyq saıajaıdy buzamyz. Qazir jańa jerlerdi bosatyp, qurylys jumystaryn pysyqtap otyrmyz. Biz jyl sońyna deıin 1,7 mıllıon sharshy metr turǵyn úıdi qosýdy josparlaǵan bolatynbyz. Biraq qosymsha jumystyń arqasynda shamamen 2 mıllıon sharshy metrdi paıdalanýǵa beremiz degen jospar bar», - dedi B.Sultanov Úkimettiń búgingi otyrysynda. Ákim onlaın rejımde esep berdi.
Aıta keteıik, Myńjyldyq alleıasy qalanyń jańa aýdanynda ornalasqan. Alleıanyń jalpy uzyndyǵy - 5,5 shaqyrym. Sonyń boıymen turǵyn úıler, bıznes ortalyqtar men saýda oryndaryn kóptep salý josparlanǵan. Osy aýdanda jańa temirjol vokzaly da ornalasqan.
