Jańa «Nurly jer» baǵdarlamasy aıasynda 650 myń otbasy baspanaly bolady – Asqar Mamın
«2019 jyly shamamen 13 mln sharshy metr turǵyn úı salý josparlanǵan. Bul ótken jylǵy kórsetkishten 500 myń sharshy metrge artyq. Sonymen qatar, turǵyn úı baǵdarlamasynyń negizgi mindetteriniń biri áleýmettik baǵytqa negizdelgen. Jyl saıyn 6 myń az qamtylǵan otbasy men 3 myń jumys isteıtin jastardy baspanamen qamtamasyz etý mindettemesin aldyq. Mamyrdan bastap ony iske asyrýǵa kiristik. Barlyq zańnamalyq normalar qabyldanyp, qajetti qarajat bólindi», - dedi Asqar Mamın Úkimet otyrysynda.
Osy oraıda Úkimet basshysy áleýmettik baǵyttaǵy turǵyn úı kólemin tolyǵymen berý jáne satyp alý boıynsha naqty sharalardy qabyldaý kerektigin tapsyrdy.
Budan bólek, Premer-Mınıstr turǵyn úıdi salýǵa, ınjenerlik ınfraqurylymdy jetkizýge ýaqtyly daıyndalýdyń mańyzy zor ekenin atap ótti.
«Memleket basshysy barlyq turǵyn úı baǵdarlamalaryn birtutas turǵyn úı saıasatyna biriktirýdi tapsyrdy. Sondyqtan bıyl 2025 jylǵa deıingi jańa «Nurly jer» memlekettik baǵdarlamasy qabyldanady, onyń aıasynda 650 myńǵa jýyq otbasy nemese 2 mıllıonnan astam adam jańa turǵyn úımen qamtamasyz etiledi», - dedi Asqar Mamın.
Osy oraıda Indýstrııa jáne ınfraqurylymdyq damý mınıstrligine múddeli memorgandarmen jáne uıymdarmen birlesip, qyrkúıekte tıisti qaýly jobasyn Úkimetke engizýdi júktedi.
Budan buryn habarlanǵandaı, Úkimet otyrysynda Indýstrııa jáne ınfraqurylymdyq damý mınıstri Roman Sklıar osy jyly 6 aı ishinde turǵyn úı qurylysyna 605,7 mlrd teńge ınvestıtsııa tartylǵanyn atap ótti.
Bul 2018 jylǵy deńgeıden 15,5 paıyzǵa joǵary. 1 teńge memlekettik qarajatqa 7,4 teńge jeke ınvestıtsııa tartyldy. Bıyldyń sońyna deıin 118 myń baspana (13 mln sharshy metr) salýdy josparladyq. Jartyjyldyq qorytyndy boıynsha 48 925 baspana (5,7 mln sharshy metr) paıdalanýǵa berildi.
