Jańa munaı óńdeý zaýytynyń salynatyn jerin kúzde aıtamyz - Bozymbaev
"Búginde Memleket basshysynyń tapsyrmasy boıynsha aldyn ala texnıkalyq-ekonomıkalyq negizdemeni ázirleıtin jumys toby quryldy. Atalǵan top ekinshi jartyjyldyqta jańa zaýyttyń ornalasatyn jerin, negizgi parametrleri men qarjylandyrý tetikterin jarııalaıdy. QazMunaıGaz tıisti jumysty bastap ketti. Kúzdiń basynda biz tórtinshi munaı zaýytynyń qaı jerde ornalasatynyn jáne onyń naqty qansha ónim shyǵara alatynyn aıtatyn bolamyz", - dedi QR Energetıka mınıstri Qanat Bozymbaev búgin qoǵamdyq keńestiń otyrysynda.
Aıta keteıik, búgingi keńeste Q.Bozymbaev munaı óndirý kólemine qatysty boljam jasady. Onyń aıtýynsha, Qazaqstanda munaı óndirý kólemi 104 mln tonnaǵa jetetin bolady. Jaqyn arada Qazaqstan ishki naryqty otandyq janar-jaǵarmaımen tolyǵymen qamtamasyz ete alady. "Bıyl Shymkent munaı óńdeý zaýytyn jańartý jumystary aıaqtalady. Osylaısha, munaı óńdeýdiń jalpy kólemi 16 tonnaǵa jetetin bolady. Sosyn munaı óńdeý zaýyttaryn jyl saıyn jóndeý ýaqyty 45 kúnnen 20 kúnge deıin qysqartý týraly sheshim qabyldandy. Endi, 45 kúndik jóndeý jumystary úsh jylda bir ret qana jasalady. Qalǵan ýaqytta 20 kúndik jóndeý júrgiziledi. Bunyń barlyǵy jóndeý jumystaryn basqarýdyń avtomatty júıesi aıasynda atqarylady. Atalǵan júıeni biz aǵymdaǵy jylda engizetin bolamyz. Al jóndeý merzimi qysqarǵannan keıin munaı óńdeý kólemi artady. Sóıtip, árbir zaýytta daıyn munaı ónimderi shamamen 30 myń tonnaǵa kóbeıedi.
Aldaǵy ýaqytta biz ishki naryqty tolyǵymen otandyq janar-jaǵarmaımen qamtamasyz ete alamyz", - dep atap kórsetti Q. Bozymbaev. 
