Jańa munaı óńdeý zaýytyn kimder salady

ASTANA. QazAqparat - QR Energetıka mınıstri Qanat Bozymbaev Qazaqstandaǵy tórtinshi munaı óńdeý zaýytynyń qurylysyna qatysatyn ınvestorlar bar ekenin málim etti, dep habarlaıdy QazAqparat tilshisi.

«Saladaǵy mańyzdy sharalardyń biri - ol Qazaqstandaǵy jańa munaı óńdeý zaýytynyń qurylysyna baılanysty. Memleket basshysynyń tapsyrmasy boıynsha jumys toby quryldy, olar óz kezeginde tehnıkalyq-ekonomıkalyq negizdemeniń jobasyn pysyqtap jatyr. Atalǵan jobany «QazMunaıGaz»  tapsyrdy. Osy tehnıkalyq-ekonomıkalyq negizdemeniń jobasy aıasynda ekinshi jartyjyldyqta zaýytyń ornalasatyn jeri men parametri, sondaı-aq jobany qarjylandyrý baǵyttary aıqyndalady», - dedi mınıstr úkimettik emes uıym ókilderimen kezdesýi barysynda.

Onyń sózine qaraǵanda, qazirgi kezde aldyn ala jeke kompanııalarmen kelissózder júrip jatyr. Osy oraıda, atalǵan zaýyt qurylysyna qatysýǵa nıetti ınvestorlar da bar. Sonymen qatar búginde jobany qarjylandyrý sharalary da pysyqtalyp jatyr.

Eske sala ketsek, Qazaqstan Prezıdenti Nursultan Nazarbaev  9 aqpan kúni Úkimettiń keńeıtilgen otyrysynda Qazaqstanda tórtinshi munaı óńdeý zaýytyn salýǵa qatysty sheshim qabyldaýdy jedeldetý qajettigin aıtqan bolatyn.