Jańa munaı óńdeý zaýyty qashan paıdalanýǵa beriledi
ASTANA. KAZINFORM — Tórtinshi munaı óńdeý zaýyty jylyna 10 mln tonna munaı óńdeıdi. Bul týraly Energetıka mınıstrligi málim etti.
— Qazaqstanda jylyna 10 mln tonnaǵa deıin munaı óńdeý qýattylyǵyna ıe jańa — tórtinshi munaı óńdeý zaýytyn salý jobasy boıynsha praktıkalyq jumystar jalǵasyp jatyr. 2026 jylǵy mamyrda jobanyń aldyn ala tehnıkalyq-ekonomıkalyq negizdemesin ázirleý jumystary bastaldy, — delingen mınıstrliktiń Kazinform agenttigine bergen jaýabynda.
Jobany iske asyrý aıasynda 2026-2033 jyldary jańa MÓZ-diń tehnıkalyq-ekonomıkalyq negizdemesin ázirleý, jobalaý, salý jáne paıdalanýǵa berý boıynsha keshendi jumystar júrgizý eskerilgen.
— Joba iske asyrylǵannan keıin, Qazaqstandaǵy munaı óńdeýdiń jıyntyq qýaty jylyna shamamen 40 mln tonnaǵa deıin ulǵaıýy múmkin. Qazirgi ýaqytta obektini ornalastyrýdyń túrli nusqalary qarastyrylyp jatyr. Qurylys orny men jobanyń qunyna qatysty túpkilikti sheshim tıisti jobalaý aldyndaǵy zertteýlerdiń nátıjeleri boıynsha qabyldanady. Osyǵan baılanysty qazirgi kezeńde naqty óńirdi jáne ınvestıtsııanyń túpkilikti kólemin ataý áli erte, — delingen vedomstvo málimetinde.
Eske salsaq, jaqynda Energetıka mınıstri Erlan Aqkenjenov qazir tórtinshi munaı óńdeý zaýyty salynatyn óńirler zerttelip jatqanyn aıtty.
Aıta keteıik, Pavlodar, Shymkent jáne Atyraý MÓZ-deriniń qýaty kezeń-kezeńimen ulǵaıtylady.
