Jańa mınıstrlik qazaqstandyqtardyń ál-aýqatyn arttyrý úshin barlyq jaǵdaıdy jasaýy tıis - QR Premer-Mınıstri
ASTANA. 17 qańtar. QazAqparat - Jańadan qurylǵan Óńirlik damý mınıstrliginiń qyzmeti tıimdi óńirlik saıasatty qalyptastyrýǵa, óńirlerdiń áleýmettik-ekonomıkalyq áleýetterin qazaqstandyqtardyń ál-aýqatyn ári qaraı arttyrý maqsatynda paıdalanýǵa baǵyttalatyn bolady.
QR Premer-Mınıstri resmı saıtynyń habarlaýynsha, bul týraly búgin Úkimet otyrysynda Serik Ahmetov málim etken.
«Óńirlik damý mınıstrliginiń qyzmeti óńirlerdiń áleýmettik-ekonomıkalyq áleýetterin, el ekonomıkasy salalarynyń áleýetterin tıimdi paıdalaný arqyly qazaqstandyqtardyń ál-aýqatyn arttyrýdy qamtamasyz etýge jaǵdaı jasaýǵa negizdeledi», - dedi S.Ahmetov óz sózinde.
«Eki agenttiktiń qosylýyna oraı, Óńirlik damý mınıstrligi endi «Óńirlerdi damytý», «Qoljetimdi turǵyn úı 2020», «Jumyspen qamtý 2020», «Aq bulaq», TShK jańǵyrtý jáne monoqalalardy damytý baǵdarlamalaryn iske asyrý jónindegi biryńǵaı úılestirýshige aınalady», - dep atap kórsetti Úkimet basshysy.
«Jańadan qurylǵan memlekettik organdar Memleket basshysynyń Jarlyǵyn iske asyrý jónindegi qajetti basqa da sharalardy qabyldaýlary kerek. Barlyq uıymdastyrý máselelerin sheship, jumysqa dereý kirisýimiz kerek. Prezıdent aldymyzǵa mańyzdy mindetter qoıyp otyr, jáne ol mindetter naqty, sapaly jáne belgilengen merzimde oryndalýy tıis», - dep mindettedi S.Ahmetov.
