Jańa mınıstr Otbasy bankiniń ıpotekalyq baǵdarlamalaryna 80 mlrd teńge surady

ASTANA. KAZINFORM – Bıyl 19 mıllıon sharshy metr turǵyn úıdi paıdalanýǵa berý úshin «Báıterek» arqyly 500 mıllıard teńge qosymsha qarajat bólý pysyqtalyp jatyr. Bul týraly Ónerkásip jáne qurylys mınıstri Ersaıyn Naǵaspaev baıandady.

− Bıyl 19 mıllıon sharshy metr turǵyn úıdi paıdalanýǵa berý úshin «Báıterek» arqyly 500 mıllıard teńge qosymsha qarajat bólý máselesi pysyqtalyp jatyr. Atap aıtqanda, 21 myń jalǵa beriletin páterdi satyp alýǵa 300 mıllıard teńge qajet. Injenerlik-kommýnıkatsııalyq ınfraqurylym qajettiligi 120 mıllıard teńge, − dedi Ersaıyn Naǵaspaev Úkimettiń búgingi otyrysynda.

Sonymen birge, mınıstrdiń aıtýynsha, Otbasy bankiniń «2-10-20» jáne «5-10-20» ıpotekalyq baǵdarlamalary boıynsha 80 mıllıard teńge qajet.

− Mınıstrliktiń turǵyn úı qurylysyn yntalandyrý jáne kezekte turǵandardy qoljetimdi turǵyn úımen qamtamasyz etý boıynsha bastamalaryn qoldaýyńyzdy suraımyn, − dedi Ónerkásip mınıstri.

Buǵan deıin Ersaıyn Naǵaspaev eldegi ónerkásipti damytý úshin qansha qarajat kerek ekenin, qoǵamdyq kólik pen arnaıy tehnıkany jańartýǵa 109 mıllıard teńge qajettigin aıtqan edi.

Búgin Ónerkásip jáne qurylys mınıstri qyzmetine kirisken Ersaıyn Naǵaspaev Úkimet úıinde ant qabyldady.