Jańa mınıstr bilim reformasy týraly aıtty
Mınıstrdiń aıtýynsha, 2019-2021 jyldary aralyǵynda mektep, kolledj ben joǵary oqý oryndarynyń 240 myńnan astam pedagogtary qaıta daıarlaý kýrstarynan ótedi.
«2020 jyldan bastap aǵylshyn tilin oqytýǵa arnalǵan kýrstarǵa qarastyrylǵan qarjy joǵary oqý oryndarynda osy tilde sabaq beretin muǵalimderdi daıyndaýǵa jumsalatyn bolady. Osy jyldan bastap mektepterge til meńgergen joǵary oqý oryndarynyń túlekteri kele bastaıdy. Pánderdi aǵylshyn tilinde oqytýdy kezeń-kezeńimen kadrlardyń daıyndyǵyna qaraı birtindep engizý josparlanyp otyr», - dedi K.Shámshıdınova Úkimettiń búgingi otyrysynda.
Aıta keteıik, búgingi otyrysta K.Shámshıdınova Prezıdent tapsyrmasy aıasynda qaı qyzmetkerlerdiń jalaqysy kóteriletinin aıtty.
«Bilim berý salasyndaǵy jalaqysy tómen qyzmetkerlerdiń eńbekaqysyn ulǵaıtý dıfferentsıaldy túrde 30 protsentke deıin júzege asatyn bolady. Bilim salasynda 500 myńǵa tarta adamnyń jalaqysy ósedi dep kútilýde. Olardyń qatarynda mektepke deıingi uıymdar men ınternattardyń tárbıeshileri, olardyń kómekshileri, metodıster, áleýmettik pedagogtar, balabaqsha men kolledj psıxologtary, qosymsha bilim berý uıymdarynyń qyzmetkerleri, kitapxanashylar, vojatyılar, býxgalterler, is júrgizýshiler, eden jýýshylar, kúzetshiler, ot jaǵýshylar, santexnıkter men elektrıkter sııaqty basqa da texnıkalyq qyzmetkerler bar. Qazirgi kezde QR Eńbek jáne xalyqty áleýmettik qorǵaý mınıstrligimen qyzmetkerlerdiń sanattaryn jáne jalaqysyn arttyrý kólemin naqty anyqtaý jumystary júrgizilýde», - dedi K.Shámshıdınova Úkimettiń búgingi otyrysynda.
