Jańa mindetterdi atqarýdy jańa Parlamenttiń quzyryna bergen abzal - M. Joldasbekov
ASTANA. QazAqparat - Jańa mindetterdi atqarýdy jańa Parlamenttiń quzyryna bergen abzal. Depýtattar bastamashy bolǵan Májilistiń merziminen buryn saılaýyn ótkizýge qatysty pikirin bildirgen memleket jáne qoǵam qaıratkeri Myrzataı Joldasbekov osylaı málim etti.
«Óz basym depýtattardyń merziminen buryn saılaý týraly usynys aıtyp, Elbasynyń atyna Úndeý joldaǵanyn quptadym. Parlament az jumys atqarǵan joq. Olar búgingi damýdyń ózegin qamtyǵan Ult Josparynyń negizin qalady, quqyǵyn qamtydy, zańyn jazyp berdi. Sol úshin olarǵa raqmet aıtýymyz kerek. Degenmen, ómirdiń ózi kórsetip otyrǵandaı, eldiń aldynda Elbasymyz aıqyndaǵan jańa mindetter tur. Al ondaı aýqymdy mindetterdi júzege asyratyn jańa Parlamenttiń kerektigin de quptaımyn. Meniń oıymsha, jańa Májilistiń quramynda jastar kóbirek bolýy kerek», - dedi Myrzataı Joldasbekov.
Onyń aıtýynsha, saıası naýqandy merziminen buryn ótkizýden utatyn tustar da barshylyq. Sonyń ishinde elimizdiń áleýmettik jańǵyrýyna, daǵdaryspen kúreste bılikke ıkemdi qımyl qajet. Merziminen burynǵy saılaý sondyqtan da mańyzdy.
