Jańa merzimge saılanǵan Bashar Asadty ulyqtaý rásimi ótti
ASTANA. QazAqparat - Sırııa prezıdenti Bashar Asad jańa jetijyldyq merzimge memleket basshysy antyn qabyldady.
3 maýsymda ótken prezıdenttik saılaýda Asad el prezıdenti retinde jańa merzimge saılanǵan bolatyn. Osymen ol endi prezıdenttik laýazymǵa úshinshi ret saılanyp otyr.
Sheteldik BAQ-tyń jazýynsha, ulyqtaý rásimi Damaskidegi Kasr ash-Shaab saraıynda ótti. Bul saltanatty sharaǵa Halyqtyq keńestiń músheleri, dinı konfessııalardyń basshylary, mádenı jáne qoǵamdyq qaıratkerler qatysty.
Aıta keteıik, bul elde úsh jyldan astam ýaqyttan beri azamattyq soǵys júrip jatyr.
Bashar Asadty daýys berýshilerdiń 89 paıyzy qoldady. Qazirgi memleket basshysyna 11,6 mln. saılaýshylardyń 10,2 mıllıony daýys berdi. Alaıda, kóterilisshiler saılaý nátıjesin moıyndamaı otyr.
