Jańa memlekettik qyzmetkerler Tuńǵysh Prezıdent kúnine oraı ant berdi
Bul týraly QR Parlamenti Májilisiniń baspasóz qyzmeti habarlady.
1991 jyldyń 1 jeltoqsany kúni el tarıhynda birinshi ret qazaqstandyqtar jalpy halyq bolyp, yntymaq pen birlik tanytyp Qazaqstan Prezıdentin saılaǵan bolatyn.
Sodan bergi ótken 21 jylda - aıtýǵa az bolǵanymen, tarıhta ǵasyrǵa teń kezeńde tuńǵysh Prezıdentimiz - Elbasy Nursultan Ábishuly Nazarbaevtyń kóregendik saıasatynyń arqasynda bizdiń elimiz Ortalyq Azııa óńirinde de, Táýelsiz Memleketter Dostastyǵy elderi arasynda da aldyńǵy qatardaǵy maqtanýǵa turatyn oryndy ıelendi. Halyqaralyq arenada da Qazaqstannyń mártebesi ósip, bizdiń elimizdi barlyǵy erekshe moıyndady. Osynyń naǵyz aıǵaǵy retinde, jaqynda ǵana Astanamyzdyń Halyqaralyq «EKSPO - 2017» kórmesin ótkizý quqyǵyn aıqyn basymdylyqpen jeńip alǵanyn aıtsaq bolady.
Qazaqstan memlekettik qyzmet salasynda da aımaqtyq kóshbasshy bolyp tabylady. Memlekettik qyzmet salasyn odan ári damytýǵa baǵyttalǵan «Qazaqstan Respýblıkasynyń memlekettik qyzmet máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań jobasyn Májilis jaqynda maquldady.
Atalǵan zań jobasynyń qabyldanýy memlekettik qyzmettiń qazaqstandyq júıesin zamanaýı úrdisterdi eskeretin ozyq halyqaralyq tájirıbege sáıkes keltirýge baǵyttalǵan.
Májilis Apparatynyń basshysy Úsen Jetenov memlekettik qyzmetke alǵashqy ret ornalasýshylar aldynda sóılegen sózinde Memleket basshysy Nursultan Ábishuly Nazarbaevtyń júrgizip otyrǵan ishki jáne syrtqy sarabdal saıasatynyń arqasynda áleýmettik-baǵdarly ekonomıkasy bar, zaman talabyna saı órkendegen, qarqyndy damýshy memleket qurý qamtamasyz etildi. Azamattardyń quqyqtary men bostandyqtarynyń saqtalýy, ultaralyq qatynastardyń turaqtylyǵy, qoǵamdaǵy kelisimniń qalyptasýy úshin qajet jaǵdaılardyń barlyǵy jasaldy. Sonymen birge Elbasynyń memlekettik qyzmettiń kásibıligin arttyrý jáne memlekettik qyzmetshilerdi halyqqa qyzmet etýge beıimdeýge baǵyttalǵan qazaqstandyq memlekettik qyzmet júıesin qalyptastyrǵanyn atap ótti.
Ant qabyldaý saltanatyna Májilis Apparatynyń 22 memlekettik qyzmetkeri qatysty. Saltanatty rásim sońynda búgin ant qabyldaǵan jas memlekettik qyzmetkerler Qazaqstan Respýblıkasynyń Tuńǵysh Prezıdenti - Elbasy Nursultan Ábishuly Nazarbaevqa jasap jatqan qamqorlyǵyna rızashylyqtaryn bildirip, bilikti, adal isterimen elimizdiń ósip-órkendeýine bar kúsh jigerlerin jumsaıtyndyqtaryn jetkizdi.
