Jańa mektepter salý esebinen Qaraǵandy oblysynda úsh aýysymdy oqytý máselesi sheshilýde
QARAǴANDY. QazAqparat – Qaraǵandy oblysynda oqýshylardy oqytý jáne pedagogtardyń jumysy úshin qajetti jaǵdaılar jasaý úshin sharalar qabyldanýda. Óńirde úsh aýysymnyń máselesin oqý oryndarynyń qurylysy sheshedi. Bıyl oblysta barlyǵy 20-dan astam áleýmettik mańyzy bar nysan salý josparlanýda, dep habarlaıdy QazAqparat tilshisi.
Osylaısha, qazirdiń ózinde 1 300-den astam bala oqıtyn tórt mekteptiń qurylysy bastaldy. Qaraǵandyda jáne Jańaarqa aýdanynda eki bilim nysany paıda bolady. Oblys ortalyǵynda, Maıqudyq 11a shaǵyn aýdanynda oqý orny 600 orynǵa, al Jańaarqa kentiniń mektebi 464 orynǵa eseptelgen.
«Úshinshi nysan Shet aýdanynyń Kıikti aýylynda salynady. Ol 150 oryndyq. Jezqazǵandaǵy Terekti stantsııasynda 80 oryndyq taǵy bir ǵımarat salynýda. Sonymen qatar, Sátbaev pen Jezqazǵanda árqaısysy 320 oryndyq eki balabaqsha salynýda. Bul Jezqazǵan óńirindegi 640 balany mektepke deıingi bilimmen qamtamasyz etýge múmkindik beredi», – dep habarlady Qaraǵandy oblysynyń qurylys, sáýlet jáne qala qurylysy basqarmasy.
Qaraǵandyda qyzdarǵa arnalǵan «Bilim-ınnovatsııa» lıtseıiniń ǵımaratyna eki qabatty qosymsha qurylys salynady. Densaýlyq saqtaý salasynda da birqatar jobalar júzege asyrylýda.
«Maıqudyq pen Suryptaýda úsh jedel medıtsınalyq járdem qosalqy stantsııasynyń qurylysy júrip jatyr. Qaraǵandyda 200 tósektik oblystyq kópbeıindi balalar aýrýhanasyn aıaqtaýdy josparlap otyrmyz. Pozıtrondy-emıssııalyq kompıýterlik tomografııa ortalyǵy, №1 kópbeıindi aýrýhana janyndaǵy qabyldaý-dıagnostıkalyq bólimshe jáne oblystyq onkodıspanserdiń operatsııalyq-reanımatsııalyq blogy salynýda. Sondaı-aq, Nura aýdanynyń Kertindi aýylynda feldsherlik-akýsherlik pýnkttiń qurylysy júrip jatyr», – dep tolyqtyrdy Qurylys, sáýlet jáne qala qurylysy basqarmasy.
