Jańa mektep oqýlyqtarynyń sapasyn tekserýde múldem jańa tásilder qoldanylady - B. Jumaǵulov
TANA. 25 tamyz. QazAqparat /Jasulan Amanbaıuly/ - Jańa mektep oqýlyqtarynyń sapasyn tekserýde múldem jańa tásilder qoldanylady.
Bul týraly búgin Astanada «Otbasy, mektep, qoǵam - ıgilikti bolashaq úshin birge!» respýblıkalyq pedagogıkalyq forým barysynda QR Bilim jáne Ǵylym mınıstri Baqytjan Jumaǵulov málim etti.
«Ótken jyly olarǵa naqty tekseris júrgizildi. Rasynda keıbir oqýlyqtardyń sapasy syn kótermeıdi. Alaıda, oqýlyqtarǵa qatysty jaǵdaıdy tym nashar dep aıtýǵa bolmaıdy. Bizde jaqsy oqýlyqtar da, myqty avtorlar da bar. Biraq, bul týraly kóbinese umyt qalyp jatady»,- dedi B. Jumaǵulov.
Aldaǵy jyldary mınıstrlik mektep oqýlyqtarynyń sapasyna kóńil bólmek jáne olarda kemshilikterdi boldyrmaý baǵytynda jumys júrgizbek.
«Bul turǵyda múldem jańa tásilder qoldanylady», - deıdi mınıstr. «MJBS men oqýlyqtar jasaý protsesinde olar syrtqy jan-jaqty saraptamadan ótedi. Ony táýelsiz joǵary bilikti sarapshylar, onyń ishinde sheteldik sarapshylar júrgizetin bolady. Olar óz qorytyndylaryna tolyq jaýapkershilik alady. Odan ári jańa oqýlyqtardy jetekshi ǵalymdardyń, pedagogterdiń, Parlament depýtattarynyń qatysýymen bedeldi Respýblıkalyq keńes qaraıtyn bolady», - dep túıdi B. Jumaǵulov.
Sondaı-aq olardy bilim berý uıymdarynda mindetti synaqtan ótkizý - bul jańa talap bolmaq. BǴM muny zańnamaǵa engizýdi usynǵan. Pedagogterdiń qorytyndysynan keıin olar paıdalanýǵa usynylatyn bolady.
