Jańa mektep qurylysyna jeke ınvestorlar tartylady - Altaı Kólginov
NUR-SULTAN. QazAqparat – Astana ákimi Altaı Kólginov mektepterdiń jetispeýshiligi máselesin sheshý joldary týraly aıtty, dep habarlaıdy QazAqparat tilshisi.
«Halyq sanynyń artýymen birge, jańa mektepterdi iske qosý máselesi de ózekti bola túsedi. Sońǵy 10 jylda elordadaǵy mektepter sany 1,5 esege artqan. Biraq, jańa syn-qaterlerge tótep berý úshin bizge áli jumys isteý kerek. Sebebi halyq sany sońǵy 10 jylda eki esege kóbeıdi. Sáıkesinshe, áleýmettik ınfraqurylymǵa – mektep, balabaqsha, densaýlyq saqtaý nysandary men kólikke salmaq túsedi», - dedi Altaı Kólginov Qazmedıa ortalyǵynda ótken QR BǴM plenarlyq otyrysynda.
Onyń aıtýynsha, sońǵy 10 jylda mektep oqýshylarynyń sany eselep artqan.
«On jyl buryn astanada 73 mektep pen 75 myń oqýshy bolsa, bıyl 108 mektep jáne qyrkúıek aıynan bastap, 185 myń oqýshy bilim almaq. Sondyqtan, elordany damytýdyń keshendi josparyna sáıkes, aldaǵy 5 jylda 40 bilim berý nysany salynady», - dedi ákim.
Ásirese, jańa mektep qurylysyna jeke ınvestorlardy tartý kózdelip otyr.
«Biz ınvestorlarǵa bar jaǵdaıdy jasaımyz. Investorlar keńesinde 11 mektep qurylysynyń jeke ınvestor esebinen júrgizýdi maquldadyq. Osydan keıin taǵy 2-3 ınvestor óz qarajatynan mektep turǵyzýǵa nıet bildirdi. Eger bul mektepter salynsa, 12 myń oqýshyny mektep ornymen qamtamasyz ete alamyz. Ázirge Nur-Sultan mektepterinde 17 myń oryn jetispeıdi», - dedi elorda ákimi.
