Jańa medıtsına mektebiniń stýdentterinen úlken jańalyqtar kútemin - Nazarbaev
ASTANA. QazAqparat - Memleket basshysy Nazarbaev Ýnıversıtetiniń medıtsına mektebinde boldy, dep habarlaıdy Aqordanyń baspasóz qyzmeti.
Іs-shara barysynda Qazaqstan Prezıdenti beıindi bilim berýdiń zamanaýı talaptaryna tolyqtaı saı keletin medıtsına mektebiniń jańa ǵımaratyn aralap kórdi.
Sondaı-aq, Nursultan Nazarbaev oqýshylarmen jáne pedagogtarmen kezdesti.
Áńgimelesý barysynda Elbasy qazirgi ýaqytta álemniń medıtsına men bıologııa salasyndaǵy ǵylymı progress aldynda turǵanyn atap ótti.
- Jańa medıtsına mektebiniń jabdyqtalýyn, oqytý deńgeıin álemniń úzdik ýnıversıtetterimen salystyrýǵa bolady. Sondyqtan men ózderińizden úlken jańalyqtar kútemin. Sizderdiń zertteýlerińiz, zerthanalyq múmkindikterińiz, oqytýshylardyń ǵylymı áleýeti syrqattyń eń kúrdeli túrlerin emdeýdiń, adam ómirin uzartýdyń jańa ádisterin tabýǵa múmkindik beredi. Bul mektep ózimen birge basqa ýnıversıtetterdi ilgeri jeteleıtin negizgi bazalyq oqý orny retinde quryldy, - dedi Memleket basshysy.
Sonymen birge, Qazaqstan Prezıdenti XXI ǵasyrda aqparattyq tehnologııalarmen qatar medıtsına men bıologııanyń da aldyńǵy orynǵa shyǵyp otyrǵanyn aıtty.
- Barlyq ǵylymdar ózara baılanysty, kóptegen jańalyqtar olardyń toǵysýynan paıda bolady. Osy oqý ornynyń qabyrǵasynda ǵylym damýǵa tıis, bizge jan-jaqty ǵalymdar qajet, - dedi Nursultan Nazarbaev.
Sońynda Elbasy jınalǵandardy oqý ornynyń jańa ǵımaratynyń ashylýymen quttyqtap, alǵa qoıǵan maqsattaryna jetýine tilektestik bildirdi.
Aıta keterligi, medıtsına mektebiniń ǵımaraty 9 qabattan turady, jalpy kólemi - 39 825 sharshy metr. Onda ǵylymı jáne oqý zerthanalary, sımýlıatsııalyq ortalyq, anatomııalyq zerthana, lektsııa zaldary men toptyq sabaq alýǵa jáne keńsege arnalǵan bólmeler, kitaphana, ashana bar.
