Jańa medıaseriktestik: Prezıdent Teleradıokesheni men RTCG memorandýmǵa qol qoıdy
ASTANA.KAZINFORM – Búgin Chernogorııa Prezıdenti ıAkov Mılatovıchtiń Qazaqstanǵa resmı sapary aıasynda Qazaqstan Prezıdentiniń Teleradıokesheni men Chernogorııanyń radıo jáne televızııasy (RTCG) ózara túsinistik pen yntymaqtastyq týraly memorandýmǵa qol qoıdy.
Qazaqstandyq jáne chernogorııalyq BAQ arasyndaǵy medıayntymaqtastyq baǵytyndaǵy alǵashqy qujatqa Prezıdent Teleradıokesheni dırektorynyń orynbasary Tilegen Ábishev pen RTCG Bas dırektory Borıs Raonıch qol qoıdy.
Qujat jańalyq almasý, mańyzdy oqıǵalar men is-sharalardy birlesip jarııalaý, sondaı-aq medıaóndiristegi ozyq tájirıbe men zamanaýı ádisterdi bólisý baǵytyndaǵy yntymaqtastyqtyń negizin qalady.
Yntymaqtastyqtyń alǵashqy kezeńinde eki eldiń jetekshi medıakompanııalary Qazaqstan men Chernogorııada bolyp jatqan oqıǵalar týraly jedel ári obektıvti aqparattyń aýdıtorııaǵa keńinen jetýine ózara qoldaý kórsetýge basymdyq beredi.
Chernogorııanyń buqaralyq aqparat quraldarymen áriptestikti damytý Qazaqstan Respýblıkasy Prezıdentiniń teleradıokesheni júzege asyryp jatqan Eýropadaǵy seriktestik jelini keńeıtý strategııasynyń bir bóligi sanalady. Buǵan deıin teleradıokeshen Belga News, BTA, Novinata, FENA, Agenzia Nova, Adnkronos, CNA, RTS, Tanjug, TASR jáne ózge de medıakompanııalarmen osyndaı kelisimder jasaǵan.
Anyqtama úshin:
Qazaqstan Respýblıkasy Prezıdentiniń teleradıokesheni – medıakontentti óndirý men taratýdyń tolyq tsıklin qamtıtyn elimizdegi eń iri ıntegratsııalanǵan medıakompanııa. Onyń quramyna qazaqstandyq aýdıtorııaǵa arnalǵan Jibek Joly telearnasy men attas radıo, halyqaralyq Silk Way, Silk Way Cinema jáne Silk Way Prime arnalary, halyqaralyq Kazinform aqparat agenttigi, Derekti kıno ortalyǵy jáne TRKLAB tsıfrlyq bólimshesi kiredi.
RTCG (Radio-televizija Crne Gore) – Chernogorııadaǵy eń iri memlekettik qoǵamdyq teleradıo kompanııasy. Onyń qurylymynda efırlik telearnalar, radıostantsııalar, jańalyqtar ınternet-portaldary jáne MNE Play OTT-platformasy jumys isteıdi.
Osyǵan deıin Prezıdent Teleradıokesheni men «Tatmedıa» medıa alıansyn qurǵan bolatyn.
