Almatydaǵy Raıymbek batyr memorıaldyq kesheniniń qurylysy qashan aıaqtalady
ALMATY. KAZINFORM – Almatyda salynyp jatqan Raıymbek batyrdyń zamanaýı mýzeılendirilgen memorıaldyq kesheniniń qurylysy 2026 jyldyń shilde aıynda aıaqtalady dep josparlanyp otyr. Bul týraly Almaty Mádenıet basqarmasy Kazinform agenttiginiń resmı saýalyna jaýap berdi.
Basqarmanyń málimetinshe, Raıymbek batyr mýzeıin qurý jobasy josparly túrde júzege asyrylyp jatyr. 2025 jylǵy 8 sáýirde nysanda qurylys-montaj jumystaryn júrgizýge arnalǵan konkýrs aıaqtalǵan. Qazirgi ýaqytta keshende qurylys jumystary qarqyndy júrgizilip jatyr.
Sonymen qatar mýzeı ekspozıtsııasyn ázirleý jáne mýltımedıalyq kontent daıyndaýmen aınalysatyn ónim berýshi uıym anyqtalǵan. Jobanyń ǵylymı mazmunyn qalyptastyrý maqsatynda belgili tarıhshylar, etnograftar men qoǵam qaıratkerleriniń qatysýymen Ǵylymı keńes qurylǵan. Keńes músheleri mýzeıdiń ǵylymı tujyrymdamasy men qurylymdyq josparyn ázirlegen.
Sondaı-aq mýzeı qoryn tolyqtyrý baǵytynda ǵylymı-zertteý jáne jınaqtaý jumystary jalǵasyp jatyr.
– Qurylys-montaj jumystarynyń aıaqtalýy 2026 jylǵy shilde aıyna josparlanǵan. Odan keıin mýzeılendirý, ekspozıtsııany ornalastyrý jáne zamanaýı mýltımedıalyq sheshimderdi engizý kezeńi bastalady, - delingen basqarmanyń Kazinform agenttigine bergen jaýabynda.
Eske salaıyq, buǵan deıin Almatydaǵy Raıymbek batyr kesenesi aýmaǵynda abattandyrý men qurylys jumystary bastalǵanyn jazǵanbyz.
Joba aıasynda tarıhı nysannyń aınalasy jańartylyp, osy zamanǵy mýzeı kesheni salynatyny habarlanǵan edi. Jumystar 2026 jylǵy aqpanda bastalyp, mamyrda tolyq aıaqtalady dep josparlanǵan bolatyn.
Joba boıynsha Raıymbek batyrǵa arnalǵan eskertkish ornatylyp, batyrdyń ómiri men jońǵar shapqynshylyǵyna qarsy kúresin baıandaıtyn ınteraktıvti ekspozıtsııalyq zaldar jasaqtalady. Kelýshiler mýltımedıalyq ınstallıatsııalar, 3D-modelder men tarıhı rekonstrýktsııalar arqyly qazaq batyrlarynyń tarıhymen tanysa alady.
Sonymen qatar keshende dárister, sheberlik sabaqtary men semınarlarǵa arnalǵan bilim berý keńistikteri qarastyrylǵan. Budan bólek, tarıhı shaıqastardy VR-tehnologııalar arqyly kórýge múmkindik beretin vırtýaldy jobalar iske qosylady.
Sondaı-aq Almaty ákimi Darhan Satybaldy memorıaldyq keshenniń qurylys alańyna baryp, nysannyń sol kezdegi ahýalymen tanysqan edi.
