Jańa maýsymda komandadan jaqsy nátıje kútemiz - Rýslan Baltıev
ALMATY. 11 naýryz. QazAqparat - «Jeńis úshin oınasaq, nátıje ózi keledi», - deıdi «Qaırat» fýtbol klýbynyń kapıtany Rýslan Baltıev. Syrt alańdaǵy alǵashqy oıynnyń aldynda Qostanaıdyń «Tobylymen» bolatyn bul kezdesý komanda úshin óte
qıynǵa túsetinin aıtqan edi. Jańa maýsymǵa ázirlik kezinde almatylyqtardyń Bas bapkeri bolyp taǵaıyndalǵan Dmıtrıı Ogaı komandany 2 aıdyń ishinde jańadan qaıta jasaqtaýǵa májbúr boldy. Óıtkeni «Qaırat» sapynda ótken maýsymda óner kórsetkenderden onda tek jartylaı qorǵaýshy Rýslan Baltıev pen qorǵaýshy Nursaıyn Joldasov qana qalǵan bolatyn. Bul synda almatylyqtardyń qaqpasyn «Atyraýdan» aýysyp kelgen Andreı Shabanov qorǵaǵan bolatyn. D. Ogaıdyń burynǵy shákirtteri bul joly qonaqtardyń qaqpasyna jaýapsyz 4 dop soqty.
«Bizdiń mindet árbir oıynda jeńýge tyrysý. Komandanyń qandaı oryn alatynyn maýsym sońynda ǵana bilemiz. Aqtóbeniń «Aqtóbe», Taldyqorǵannyń «Jetisý», Qaraǵandynyń «Shahter», Qostanaıdyń «Tobyl» sııaqty komandalarymen bolatyn kezdesýler bizge birshama qıyndyq týdyrýy múmkin. Degenmen komanda úshin kez kelgen oıyn mańyzdy. Ony birinshi ne sońǵy dep bóle-jarýǵa bolmaıdy», - deıdi R. Baltıev.
