Jańa maýsymda «Barys» komandasynyń sapynan Ibraıbekovti kórýimiz yqtımal
ASTANA. QazAqparat - «Barys» hokkeı klýbynyń bas bapkeri Andreı Nazarov komandanyń Shveıtsarııanyń Sýrsı qalasynda ótip jatqan jattyǵý jıyndarynyń alǵashqy kezeńinen keıin, hokkeıshilerdiń eńbegine kóńili tolatyndyǵyn aıtýda, dep habarlaıdy «Sport Ekspress».
«Komanda keremet eńbektenýde, oıynshylar jattyǵýdan soń bólmelerine áreń keledi, qazirgi kezeńde bul jaqsy olar úshin, - dep atap ótti Nazarov. - Taýly aımaqtardaǵy daıyndyq ádisi «Severstalda» júrgenimde jasalǵan. Jergilikti jerdiń shıpaly aýasyna senemiz. Astanada 12 myń oryndyq zamanaýı jańa stadıonnyń shatyry salynyp bitkendigi týraly habar komanda úshin dopıng boldy. Sebebi bul komandanyń 2015/2016 maýsymda jańa muz aıdynynda oınaıtynyn bildiredi. Biz jańalyqqa qýanyshtymyz».
Onyń aıtýynsha, komanda sapynda yjdahatty, óz eńbegine adal hokkeıshiler jeterlik. Tipti kózge túsken jastar da bar.
«Keshe barlyq komandamen birge týǵan kúnin atap ótken Ýpperdiń aýyr-aýyr jattyǵýlardy kásibı turǵyda eńserip, shydamdylyq tanytyp júrgeni meni tańqaldyrady. Sonymen qatar Polışýk, Jaılaýov jáne taǵy basqalary da jaqsy qyrynan kórinip júr. Jastar arasynan qorǵaýshy Ibraıbekovtiń óneri keremet, negizgi quramǵa iligýge suranyp tur», - dedi ol.
Aıta keteıik, Madııar Ibraıbekov «Barys» klýbynyń farm-komandasynda óner kórsetýde. Bunyń aldynda ol "Qazaqmys-95" komandasynyń kapıtany jáne Qazaqstannyń jasóspirimder quramasynyń oıynshysy bolǵan.
