Jańa maýsymda «Astana» quramynda amerıkalyq jas basketbolshy Adam Kemp óner kórsetedi
ASTANA. QazAqparat - Eýrobaskettiń makedonııalyq «Feni industries» komandasynda óner kórsetken amerıkalyq jas sportshy Adam Kemp 2015/2016 jyldary «Astana» basketbol klýbynyń namysyn qorǵaıtyn bolady. Klýb pen basketbolshy kelisimshartqa qol qoıdy.
Bul týraly klýbtyń baspasóz baıanynda habarlanǵan. Adam Kemp shabýyldy túıindeı alatyn, uzyn boıly (boıy 208 sm), deneli sportshy. Ol qorǵanysta da myqty oınaı alady. Qarsylas shabýylynan keıin dopqa ıelik etý kórsetkishi boıynsha Makedonııa chempıonatynyń 2014/2015 jylǵy maýsymynda úzdikter qatarynda boldy.
Ótken maýsymda ol «Feni industries» sapynda 25 oıyn ótkizip, orta eseppen 1 matchta 12.1 upaı jınap otyrǵan.
Aıta keteıik, «Astana» basketbol klýby 2011 jyly qurylǵan. «Astana» Prezıdenttik kásibı sport klýbynyń quramyna kiredi. Tórt dúrkin Qazaqstan kýbogynyń ıegeri, QR Ulttyq lıgasynyń eki márte chempıony, sońǵy úsh maýsym boıy qatarynan VTB Birikken Lıgasynyń pleı-offyna shyǵyp keledi.
