Jańa magıstraldyq gaz qubyrynyń 80%-y Qaraǵandy oblysynyń aýmaǵy arqyly ótedi
QARAǴANDY. QazAqparat - Memleket basshysynyń elimizdi ári qaraı gazben qamtýyn jalǵastyrý bastamasy Qaraǵandy oblysynyń turǵyndary úshin de úlken mańyzǵa ıe. Kógildir otyndy oblystaǵy 6 iri qala men 120 aýyldyq eldi meken alady. Ol jaıly Erlan Qoshanov Elbasynyń «Prezıdenttiń bes áleýmettik bastamalary» halyqqa Joldaýyn talqylaý boıynsha aktıv jınalysynda aıtyp berdi, dep habarlaıdy «QazAqparat» HAA oblys ákiminiń baspasóz qyzmetine silteme jasap.
Elbasy Qaraózek - Jezqazǵan - Qaraǵandy - Temirtaý - Astana arqyly magıstraldyq gaz qubyryn salý boıynsha jobany júzege asyrýdy tapsyrdy. Onyń basty maqsaty - Qarashyǵanaq, Teńiz, Qashaǵan batys ken oryndary esebinen oblystaǵy eldi mekenderdi tabıǵı gazben qamtamasyz etý jáne elimizdiń biryńǵaı gaz taratý júıesin kezeń-kezeńimen damytý bolyp tabylady.
«Biz barynsha ekonomıkalyq, áleýmettik jáne ekologııalyq áserdi sezinetin bolamyz. Gaz qubyry trassasynyń Astanaǵa deıingi uzyndyǵy 1100 shaqyrymnan asady, onyń 80%-y - 820 shaqyrymy bizdiń oblystyń aýmaǵy arqyly ótedi. Halyqty qamtý kórsetkishi shamamen 1 mln adamdy quraıtyn bolady. Oılanyp qarasaq, ol oblys turǵyndarynyń 70%-y, - dedi Erlan Qoshanov. - Joba sheńberinde Qaraǵandy, Temirtaý, Jezqazǵan, Sátpaev, Saran jáne Shahtınsk sekildi oblysymyzdyń iri qalalary, sondaı-aq Abaı, Jańaarqa, Buqar Jyraý, Osakarov, Shet, Ulytaý aýdandarynyń 120 eldi mekeni gazben qamtylady».
Sonymen qatar, otynnyń baǵasy tómendeýi esebinen aımaǵymyzdyń ónerkásibi jańa ekpinge ıe bolady, dep atap ótti oblys ákimi. Kógildir otynǵa aýysý ekologııany da jaqsartýǵa múmkindik beredi.
Erlan Qoshanov gaz qubyryn salýǵa arnalǵan jer telimderin bólýdi ýaqtyly júzege asyrýdy qatań tapsyrdy. Sonymen qatar oblysta eldi mekender men áleýmettik mádenı nysandardy da gazben qamtý boıynsha jobalar jasala bastaıdy.
