Jańa qyzmetke kelgen jerimde qyzmetkerlerdi aýystyratyn ádetim joq - Munaı jáne gaz mınıstrligi

ASTANA. 18 qyrkúıek. QazAqparat - Búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Munaı jáne gaz mınıstri Uzaqbaı Qarabalın ózi basqaryp otyrǵan vedomstvo qyzmetkerleriniń biliktiligin «tym jaqsy» dep baǵalady.

«Meniń osy qyzmetke kelgenime tek eki aı boldy. Jańa qyzmetke kelgen jerimdi qoparyp, qyzmetkerlerdi jumystan shyǵaryp, oryndaryna basqa azamattardy ákeletindeı ádetim de joq, ekinshiden zań boıynsha adamdardy osylaısha aýystyrýǵa bolmaıdy. Sondyqtan meniń baıqaýymsha, búginde mınıstrlikte jumys istep otyrǵan ujymda kóp jyldardan beri qyzmet istep kele jatqandar bar jáne sheteldegi jaqsy ýnıversıtetterdi aıaqtap kelgen jas mamandar barshylyq», - dep toqtaldy mınıstr.

Osy oraıda ol ózi basqaryp otyrǵan vedomstvo qyzmetkerleriniń biliktilik deńgeıin jetkilikti dep baǵalady.

U. Qarabalın osy qyzmetkerler budan ary qaraı alǵa umtylyp, ózderin shyńdaı túsýleri kerek ekenin atap ótti.