Jańa qylmystyq is júrgizý kodeksinde mámilege kelýdiń eki túri qamtylatyn bolady - I. Merkel
ASTANA. 21 qańtar. QazAqparat - Jańa qylmystyq is júrgizý kodeksinde mámilege kelýdiń eki túri qamtylatyn bolady. Búgin Májilistiń Zańnama jáne sot-quqyqtyq reformalar komıtetiniń keńeıtilgen otyrysynda Iogan Merkel osylaı málim etti.
Eske salaıyq, komıtet otyrysynda Qylmystyq is júrgizý kodeksiniń jańa redaktsııasy talqylanǵan bolatyn. «Jańa kodeks jobasynda mámilege kelýdiń eki formasy engiziledi. Onyń biri - kináni moıyndaý, ekinshisi - yntymaqtastyqqa kelý. Bul rette birinshi forma asa aýyr qylmystyq áreketterge qoldanylmaıdy jáne japa shegýshige negizinen keltirilgen zalaldyń ornyn toltyrýdy shapshańdatýǵa baǵyttalady. Ekinshi forma uıymdasqan qylmyspen, ekstremızmmen, terrorızmmen baılanysty erekshe qaýipti qylmystardy ashýǵa baǵyttalady. Sonymen qatar, búgingi kúni qoldanylyp júrgen sotqa deıingi ońtaılandyrylǵan óndiris bazasyndaǵy jedel óndiriske alý ınstıtýty saqtalatyn bolady», - deıdi QR Bas prokýrorynyń orynbasary Iogan Merkel. Onyń sózine qaraǵanda, joǵaryda atalǵan mámilege kelýdiń eki formasy men jedeldetilgen óndiris máselesi sotta qaralatyn bolady. «Kodeks jobasymen engiziletin mundaı jańalyqtar sotqa deıingi jáne sottaǵy óndiristi jeńil ári jedel atqarylýyna septigin tıgizedi. Osynyń ózi búkil qylmystyq is júrgizý úderisin únemdi etpek», - deıdi prokýratýra ókili.
