Jańa qurylys erejesi Almatynyń tarıhı ortalyǵyn saqtaýǵa baǵyttalǵan - ákimdik

ALMATY. QazAqparat – Óńirlik kommýnıkatsııalar qyzmetindegi brıfıng barysynda Almatynyń josparlaý jáne ýrbanıstıka basqarmasynyń basshysy Almashan Ahmedjanov qala qurylysyn erekshe retteý aımaqtary jáne oǵan neler jatatynyn jetkizdi, dep habarlaıdy QazAqparat tilshisi.

Basqarma basshysynyń aıtýynsha, qala qurylysynyń ereshke aımaqtaryna shekarasy qalanyń bas josparynda bekitilgen qala qurylysynyń erekshe baqylaýyndaǵy tarıhı ortalyqtar, sondaı-aq tarıhı jáne mádenı eskertkishter qorǵalatyn aımaqtar jatady.

«Tarıhı ortalyq shekarasynda restavratsııalyq ári zańnamada kórsetilgendeı, eskertkishterdi jańǵyrtý nemese qorǵaý boıynsha jumystar júrgizýge, qasbettik sheshimderdi jáne abattandyrýdy saqtaı otyryp, kásipkerlik qyzmet úshin turǵyn úıdi nemese onyń birinshi qabatyn qaıta jabdyqtaýǵa ruqsat etiledi», - dedi ol.

Sondyqtan qorǵalatyn aımaqtardaǵy tarıhı jáne mádenı eskertkishterdiń qurylymyn jáne tarıhı ǵımarattardyń stıli, proportsııasy men bıiktigin buzýǵa tyıym salynady.

Sondaı-aq, ruqsat etilgen bıiktikten, qorshaǵan aımaqtaǵy qurylystardyń ortasha bıiktiginen asyp ketýge, tarıhı aımaqtaǵy ári 50 metrge deıingi radıýstaǵy tarıhı-mádenı eskertkishterdiń qorǵalatyn aımaqtaryndaǵy sáýlettik sheshiminiń buzýylýyna jol berilmeıdi.

Eske salaıyq, «Qalanyń sáýlettik kelbetin qalyptastyrý jáne qala qurylysyn josparlaý erejeleri» Almaty ákimi Baqytjan Saǵyntaevtyń tapsyrmasy boıynsha ázirlengen. Qujat VII shaqyrylǵan qala máslıhatynyń kezekten tys VІ sessııasynda qabyldandy.