Jańa qurylys erejesi Almatyny áleýmettik ınfraqurylymmen keshendi qamtıdy
ALMATY. QazAqparat- Óńirlik kommýnıkatsııalar qyzmetiniń baspasóz máslıhatynda qalalyq josparlaý jáne ýrbanıstıka basqarmasynyń basshysy Almashan Ahmedjanov jergilikti atqarýshy organdardyń erekshe baqylaýynda turǵan «núkteli» qurylys jaǵdaıyn sheshý týraly aıtyp berdi, dep habarlaıdy QazAqparat tilshisi.
Almashan Ahmedjanov QR Prezıdentiniń tapsyrmasyn oryndaý aıasynda qala ákimi Baqytjan Saǵyntaevtyń bastamasy boıynsha «Qalanyń sáýlettik kelbetin qalyptastyrý jáne qala qurylysyn josparlaý erejeleri» ázirlengenin aıtty.
Ádilet mınıstrligi 2021 jyldyń maýsym aıynda bekitken qujat «núktelik» qurylysty toqtatýǵa múmkindik berdi. Almatynyń bas sáýletshisiniń sózinshe, mehanızm «núkteli» qurylysty boldyrmaýǵa jáne tıisti áleýmettik ınfraqurylymy bar aýmaqtardy keshendi damytýdy qamtamasyz etýge baǵyttalǵan. Ereje qurylys salýshylardy turǵyn úımen birge áleýmettik nysandar salýǵa zańnamalyq túrde mindetteýge baǵyttalǵan.
«Erejede sondaı-aq jobalarǵa qoıylatyn talaptar kórsetilgen. Mysaly, qurylys salýshylar halyqtyń tyǵyzdyǵyn eskerýge, erekshe qurylystyq retteý aımaqtarynda, ásirese tarıhı ortalyqta reglamentti saqtaýǵa, kósheniń nemese oramnyń qabattylyǵy men qalyptasqan sáýlettik beınesin eskerýge mindetti», - dep túsindirdi spıker.
Jańa erejeler sondaı-aq qurylys jobalaryna qoǵamdyq talqylaýlar ótkizýdi jáne qalanyń bas jospary talaptarynyń saqtalýyn baqylaýdy kózdeıdi. Qalalyq josparlaý jáne ýrbanıstıka basqarmasynyń basshysy qabyldanǵan erejelerge qaramastan, Almatyda birqatar nysandar boıynsha qoǵam qaıratkerleri men qurylys salýshylardyń qarsylyǵy jalǵasyp jatqanyn tilge tıek etti.
Sonymen qatar, áleýmettik ınfraqurylymǵa júktemeniń artýy halyqtyń narazylyǵyn týdyrady. Qabyldanǵan erejeler daýly máselelerdi sheshýge kómektesedi. Mysaly, sharshy metrdi áleýmettik ınfraqurylymdy damytýǵa baılanystyrý ornatyldy. Máselen, myń adamǵa mindetti túrde 180 mektep orny jáne balabaqshalarda 100 oryn qarastyrylýy tıis.
«Aýla aýmaqtarynda qurylys salýǵa jol bermeý úshin bir adamǵa 10 sharshy metr aýlanyń normasy engizilgeni mańyzdy, onyń tórtten bir bóligi jasyl jelekterge bólinedi. Daýlardy boldyrmaý úshin jańa erejelerde halyqtyń tyǵyzdyǵy toqsandyq qurylys kezinde 1 gektarǵa 440 adamnan aspaıtyn, al tarıhı ortalyqta bir gektarǵa 300 adamnan aspaıtyn eseppen esepteletini kórsetilgen», - dedi Almatynyń bas sáýletshisi.
Sondaı-aq, qujat turǵyn aýdandar men shaǵyn aýdandardaǵy halyqtyń tyǵyzdyǵyna qoıylatyn talaptardy, sondaı-aq kóp páterli turǵyn úılerdiń uzyn jaqtary arasyndaǵy alshaqtyqtyń mınımaldy mólsherin anyqtaıdy. 3-5 qabatty ǵımarattarda-keminde 20 metr, 10-16 qabattarda – keminde 48 metr, al 17 jáne odan joǵary qabattarda qashyq 80 metrge deıin artady. Sonymen qatar, ol ákimdikpen sottasatyn qurylys salýshylar bar ekenin aıtty. Ol Abaı dańǵylyndaǵy 130-úıdiń qurylysyna qatysty jaǵdaıdy mysal retinde keltirdi.
«Ákimdik turǵyndardyń shaǵymdaryn nazarǵa alyp, ondaǵy qurylysty toqtata turýǵa sheshim qabyldady. Alaıda qurylysshy sotqa júginip, protseste jeńdi. Mamandandyrylǵan aýdanaralyq qalalyq sottyń sheshimimen qurylys salýshynyń ákimdikke jáne naqty basqarmaǵa qatysty talap aryzy qanaǵattandyryldy. 5 qarashasynda bizdiń vedomstvo sot sheshimine apellıatsııalyq shaǵym berdi. Búginde nysannyń qurylysy toqtatyldy», - dedi ol.
Bas sáýletshi olardyń vedomstvasy joba aldyndaǵy qujattamany berý kezinde jańa standarttardy qatań ustanýdy jalǵastyrady dep ýáde berdi.
