Jańa Quryltaıdyń depýtattary qyzmetine qashan kirisýi múmkin

ASTANA. KAZINFORM – Senat tóraǵasy Máýlen Áshimbaev aldaǵy referendýmda halyq jańa Konstıtýtsııa jobasyn qoldasa, bir palataly Quryltaıdyń depýtattary qashan saılanatynyn aıtty.

Osy oraıda ol Senat pen Májilistiń ókilettigi toqtaǵannan keıin eki aı ishinde saılaý ótýi tıis ekenin eske saldy.

- Osy is-sharalar 1 qyrkúıekke deıin atqarylady. Al 1 qyrkúıekten bastap jańa Parlament - Quryltaı óz jumysyna kirisedi. Eger Qazaqstan halqy jańa Konstıtýtsııa jobasyn qoldaıtyn bolsa, ótpeli kezeń erejelerine sáıkes, biz osy qurammen 1 shildege deıin jumys isteımiz. Sodan keıin jańa Parlament 1 qyrkúıekte jumysyn bastaıdy, - dedi Máýlen Áshimbaev Senatta tilshiler suraǵyna jaýap bere otyryp.

Atap aıtqanda, Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy. 

Jalpyhalyqtyq referendýmǵa shyǵarylǵan jańa Konstıtýtsııa jobasy qabyldanǵan jaǵdaıda, Ata zańnyń naqty qashan kúshine enetini anyq jazylǵan.

Naqtyraq aıtqanda, respýblıkalyq basylymdardy jarııalanǵan jańa Konstıtýtsııa jobasynyń 95-babynda 1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes qalyptastyrylǵan Qazaqstan Respýblıkasynyń Parlamenti óz ókilettigin 2026 jylǵy 1 shildeden bastap toqtatatyny jazylǵan.

Al Konstıtýtsııa kúshine engen kúnnen bastap bir aı ishinde Qazaqstan Respýblıkasynyń Prezıdenti Quryltaı saılaýyn jarııalaıdy jáne ol eki aı ishinde ótkiziledi.