Jańa Quryltaı: zań jobalary úsh oqylymda qaralady
ASTANA. KAZINFORM – Zań shyǵarý bastamasy quqyǵy tek qana Quryltaıda iske asyrylady. Bul týraly búgin elordada Quryltaı Reglamentiniń jobasyn qabyldaý kezinde depýtat Snejanna Imasheva málim etti.
- Zań shyǵarý protsesi – Reglamenttiń eń aýqymdy ári mazmundy bólikteriniń biri. Jobada zań jobasynyń Quryltaıǵa engizilgen kezinen bastap zań qabyldanǵanǵa deıingi búkil ótý joly tolyǵymen retteledi. Zań shyǵarý bastamasy quqyǵy tek qana Quryltaıda iske asyrylady. Zań jobasy tirkelgennen keıin Bıýro ony bas komıtetke jiberedi. Bas komıtet jumys tobyn quryp, zań jobasynyń odan ári pysyqtalýyn uıymdastyrady. Zań jobasy úsh oqylymda qaralady. Halyqaralyq shartty ratıfıkatsııalaý nemese denonsatsııalaý týraly zańdar buǵan jatpaıdy. Mundaı jobalar eki oqylymda qaralady, - dedi S. Imasheva Quryltaıdyń jalpy otyrysynda.
Onyń aıtýynsha, birinshi oqylymda zań jobasynyń maqsattary, mindetteri, negizgi erejeleri, sondaı-aq ony qabyldaýdyń yqtımal áleýmettik-ekonomıkalyq, quqyqtyq jáne ózge de saldary talqylanady. Birinshi oqylymnan keıin túzetýler egjeı-tegjeıli pysyqtalady. Olardy jumys toby men bas komıtet jınaqtap, salystyrma kestege engizedi.
Ekinshi oqylymda jumys tobyna nemese bas komıtetke engizilgen zań jobasyna túzetýler qaralady. Al úshinshi oqylym Quryltaıdaǵy zań shyǵarý rásimin aıaqtaıdy. Bul kezeńde zań jobasyn Qazaqstan Respýblıkasynyń Konstıtýtsııasyna jáne ózge de zańnamasyna, zań tehnıkasy qaǵıdalaryna sáıkes keltirýge, ishki qaıshylyqtar men redaktsııalyq sıpattaǵy eskertýlerdi joıýǵa baǵyttalǵan túzetýler ǵana qaralady.
- Ekinshi oqylymda maquldanǵan jobanyń quqyqtyq mazmunyn ózgertetin túzetýler qaralmaıdy. Túzetýlermen jumys isteý tártibi de jeke rettelgen. Jobada depýtattardyń, komıtetterdiń jáne fraktsııalardyń túzetýler engizý tártibi, salystyrma kestelerdi daıyndaý, túzetýlerdi jumys toby men bas komıtette qaraý rásimderi belgilengen. Sonymen qatar Quryltaıda qaralyp jatqan zań jobalaryna Úkimettiń usynystaryn qaraýdyń arnaıy tártibi kózdelgen. Komıtet usynystardy qarap, onyń qorytyndysy boıynsha olardy salystyrma kestege engizý nemese engizbeý týraly sheshim qabyldaýǵa tıis. Bul, bir jaǵynan, jedel zańnamalyq den qoıý múmkindigin saqtap qalý, al ekinshi jaǵynan – zańnamalyq bastamanyń belgilengen rásimin almastyrýǵa jol bermeý úshin óte mańyzdy, - dedi depýtat.
Onyń sózine qaraǵanda, zań jobasyn zańnamalyq bastama sýbektisi ony qaraýdyń kez kelgen kezeńinde qaıtaryp ala alady. Reglamentte zańnamalyq sıpatta bolmaıtyn aktilerdi qabyldaý tártibi de rettelgen. Olarǵa ótinishter, deklaratsııalar men málimdemeler jatady.
- Sonymen birge Reglament Quryltaıdyń Konstıtýtsııada kózdelgen laýazymdy adamdardy taǵaıyndaýǵa Prezıdentke kelisim berý, Joǵarǵy Sot sýdıalaryn saılaý jáne qyzmetten bosatý, sondaı-aq Konstıtýtsııalyq Sot pen Joǵarǵy Sot sýdıalaryn qol suǵylmaýshylyqtan aıyrý jónindegi ókilettikterin júzege asyrý tártibin aıqyndaıdy. Tıisti usynymdar men kandıdatýralardy engizý jáne qaraý, olardy talqylaý, daýys berý jáne Quryltaı sheshimderin qabyldaý rásimderi belgilenedi, - dedi S. Imasheva.
Budan buryn habarlanǵandaı, Quryltaı otyrystary ótetin apta kúnderi bekitildi.
