Jańa Qurylys kodeksiniń jobasy: Ulttyq tehnıkalyq normalaý ınstıtýty qurylady
ASTANA. KAZINFORM – Ulttyq tehnıkalyq normalaý ınstıtýty qurylystaǵy normatıvtik-quqyqtyq bazany jetildirýmen aınalysady. Bul týraly Májilistiń jalpy otyrysynda Qurylys kodeksiniń jobasyn birinshi oqylymda talqylaý kezinde QR Ónerkásip jáne qurylys mınıstri Ersaıyn Naǵaspaev málim etti.
- Qurylys salasyndaǵy kóptegen ereje men normalar áli kúnge deıin keńestik dáýirden qalǵan. Árıne, táýelsizdik alǵannan beri bul salada úlken ózgerister jasalyp, normatıvtik baza birneshe ret qaıta qaraldy. 2010 – 2020 jyldar aralyǵynda tehnıkalyq retteý júıesinde aýqymdy reforma júrgizildi. Onyń aıasynda eýrokodtar júıesi engizildi, qaýipsizdik pen energııa tıimdiligine qatysty qujattar ózgertildi. Biraq soǵan qaramastan, keıbir normalar eskirgen qalpynda qalyp, búgingi zamannyń talaptaryna tolyq jaýap bere almaı otyr. Sondyqtan normatıvtik bazany turaqty túrde jańartyp, zamanǵa beıimdeý maqsatynda jańa Qurylys kodeksinde tehnıkalyq normalaý júıesine erekshe nazar aýdaryldy. Kodeks aıasynda Ulttyq tehnıkalyq normalaý ınstıtýtyn qurý josparlandy. Ol normatıvtik-quqyqtyq bazany jetildirý isin óz qolyna alady, - dedi E. Naǵaspaev.
Bul organ normatıvterdiń qalaı qoldanylyp jatqanyn baqylap, qajet bolǵan jaǵdaıda túsindirme beredi, jańa tehnologııalar men tájirıbelerdi eskerip, ózgerister usynady.
Budan basqa, qurylys, sáýlet, ınjenerlik júıeler, qurylys materıaldary sııaqty baǵyttar boıynsha arnaıy tehnıkalyq komıtetter qurý eskerilgen. Bul komıtetterge kásibı mamandar, ǵylymı uıymdar, bıznes ókilderi men memlekettik organdar qatysady.
- Osylaısha normalaý júıesiniń damýyna barlyq múddeli taraptar tartylyp, qurylys salasyna zamanaýı, ıkemdi jáne ashyq tehnıkalyq retteý júıesi engiziledi, - dedi mınıstr.
Budan buryn habarlanǵandaı, depýtat Baqytjan Bazarbek jańa Qurylys kodeksiniń jobasynda adam qaýipsizdigi birinshi orynda bolatynyn aıtqan edi.