Jańa Qurylys kodeksinde turǵyndardyń qaýipsizdigine ekpin qoıylady - depýtat
ASTANA. KAZINFORM – Jańa Qurylys kodeksiniń jobasynda azamattardyń qaýipsizdigine erekshe ekpin qoıylyp otyr. Sol sebepti memlekettik baqylaý tetikterin kúsheıtý pysyqtalyp jatyr.
Atap aıtqanda, búgin elordada Májilis janyndaǵy Qoǵamdyq palata otyrysynda Qurylys kodeksiniń jobasy talqylanyp jatyr.
- Jalpy, Qurylys kodeksiniń jobasyna qatysty bastapqyda biraz syn aıtyldy. Degenmen, jumys tobynyń otyrysy bastalǵannan keıin, berneshe ret qaıta talqylaý ótkizip, qujat normalary retke kelip qaldy. Depýtattar óziniń usynystaryn berip jatyr, sarapshylarmen de pikir almasý boldy. Qazirgi kezde 630 jańa usynys berildi. Qujat jobasynan úı qurylysyna qatysty bir tarmaǵyn alyp tastadyq. 630-ynyń shamamen jartysy qabyldandy, al qalǵandary pysyqtalyp jatyr. Jumys tobynyń múshesi retinde 120-ǵa jýyq sarapshy endi. Aptasyna kem degendi bir ret jumys tobynyń otyrysyn uıymdastyryp kelemiz, - dedi Májilis depýtaty Murat Ábenov tilshiler suraǵyna jaýap bere otyryp.
Onyń aıtýynsha, Qurylys kodeksiniń basty maqsaty – azamattardyń qaýipsizdigin qamtamasyz etý.
- Osy qujatta tek qurylys salasy nemese qurylys kompanııalarynyń jumysyn retteý maqsatynda ǵana emes, birinshi kezekte turǵyndardyń qaýipsizdigine ekpin qoıylǵan. Qalalarda qurylysty retteý qajet. Ákimdiktermen kelisip, bos jerge úı sala berýge bolmaıdy. Áleýmettik nysandar qurylysyn umytpaý kerek. Árıne, talqylaý kezinde túrli kózqaras bar, qarama-qaıshy pikirler aıtylyp jatyr. Birneshe jyl buryn Qazaqstanda qurylysqa qatysty salalardy memlekettik baqylaýdan jeke kompanııalarǵa berip jibergen. Bul rette saraptama, tekserý baǵyttaryn aıtýǵa bolady. Ókinishke qaraı, osyny naryqqa berip jibergennen keıin, memlekettik baqylaýdy joǵaltyp aldyq. Sondyqtan byltyr Prezıdenttiń qujat jobasyna qatysty aıtqany negizinen adamdardyń qaýipsizdigine qatysty boldy, - dedi depýtat.
Onyń sózine qaraǵanda, iri jobalar – mektepter men aýrýhanalar, iri zaýyttar, fabrıkalar memlekettik deńgeıdegi saraptamada qalady jáne qadaǵalaý kúsheıtiledi. Az qabatty nysandar, jeke ǵımarattardy jeke salada qaldyrý eskerilgen. Jalpy, bul baǵytta qurylystyń kúrdeliligi qarastyrylady.
- Máselen, úsh jyl buryn salynǵan mekteptiń nemese balabaqshanyń apatty jaǵdaıda ekeni anyqtalyp jatady. Shyn máninde, kompanııalar qurylys salý quqyn alyp, ózderi nysandy salyp, ózderi tekserip, paıdalanýǵa berip otyr. Osynyń saldarynan olardy qadaǵalaý tıisti deńgeıde bolmady. Bul jerde qurylys kompanııalarynyń ǵana múddesi qorǵalsa, onda osy saladaǵy daý-damaı ýshyǵa túsetini anyq. Birinshi kezekte kodekste adamdardyń qaýipsizdigine ekpin qoıylady, - dedi Murat Ábenov.
Onyń paıymynsha, Qurylys kodeksin Parlament jyldyń aıaǵyna deıin qabyldaýy múmkin.
Eske salsaq, byltyr aqpan aıynda Májilis depýtattaryna qurylys kodeksiniń jobasy usynyldy.
Sol jıyn barysynda Májilis depýtaty Baqytjan Bazarbek atalǵan qujattaǵy normalardy synǵa aldy.
Sonymen qatar, byltyr Úkimettiń keńeıtilgen otyrysynda Memleket basshysy Qasym-Jomart Toqaev qala qurylysy týraly kodekstiń jobasy talapqa saı emes ekenin aıtty.
2024 jyly naýryz aıynda Ónerkásip jáne qurylys mınıstri Qanat Sharlapaev jańa qurylys kodeksiniń jobasyna qatysty depýtattardyń aıtqan synyna jaýap berdi.