Jańa Qurylys kodeksi jyl sońyna deıin qabyldanýy kerek — Prezıdent
ASTANA. KAZINFORM — Qurylystyń barlyq kezeńin tolyq esepke alýdy qamtamasyz etetin ulttyq tsıfrlyq platformany iske qosý qajet. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.
Memleket basshysy sońǵy jyldary qarqyndy damyp kele jatqan turǵyn-úı qurylysy salasyna aıryqsha nazar aýdarý qajettigin atap ótti.
— Byltyr 19 mıllıon sharshy metr baspana paıdalanýǵa berildi. Sonymen birge, qurylys sapasyn arttyrý úshin jasandy ıntellekt tehnologııalarynyń (Building Information Modeling, BIM) kómegimen ǵımarattardy aqparattyq modeldeý ádisin keńinen qoldaný kerek. Úkimet qurylystyń barlyq kezeńderin tolyq esepke alýdy, josparlaýdy, oǵan monıtorıng júrgizýdi qamtamasyz etetin ulttyq tsıfrlyq platformany iske qosý qajet. Al jańa Qurylys kodeksi osy salanyń qaýipsiz ári ashyq bolýyna jáne turaqty damýyna jol ashatyn berik zańnamalyq negizge aınalýǵa tıis. Qujatty jyl sońyna deıin qabyldaý kerek. Depýtattardyń bul jumysqa atsalysýyn suraımyn, — dedi Qasym-Jomart Toqaev.
Sondaı-aq Memleket basshysy joǵary tehnologııaǵa 1 mlrd dollar ınvestıtsııa tartý týraly baǵdarlama ázirleý qajettigin aıtty.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.