Jańa Qurylys kodeksi: ashyqtyq, seısmıkalyq qaýipsizdik jáne sybaılas jemqorlyq táýekelderin tómendetý
ASTANA. KAZINFORM - Memleket basshysy bıyl 9 qańtarda qol qoıǵan jáne 1 shildeden bastap kúshine enetin Qazaqstan Respýblıkasynyń jańa Qurylys kodeksine sáıkes, elde salany zamanaýı talaptardy eskere otyryp odan ári damytý maqsatynda birqatar negizgi jańashyldyqtar engizildi. Bul týraly Qazaqstan Respýblıkasynyń Ónerkásip jáne qurylys mınıstrligi habarlady.
Qala qurylysy jobalaryna mindetti saraptama júrgizý
Qazaqstanda ázirlenetin jáne túzetýler engiziletin barlyq qala qurylysy jobalaryna, onyń ishinde egjeı-tegjeıli josparlaý jobalaryna (EJJ) mindetti túrde saraptama júrgizý engiziledi.
Bul shara qatelikterdi erte kezeńderde anyqtaý, sybaılas jemqorlyq táýekelderin azaıtý jáne qujattardyń ashyqtyǵyn qamtamasyz etý maqsatynda júzege asyrylady.
Sonymen qatar EJJ-ge túzetýler engizý eki jylda bir retten artyq júrgizilmeıdi.
Memlekettik qala qurylysy kadastrynyń avtomattandyrylǵan aqparattyq júıesi
Elde Memlekettik qala qurylysy kadastrynyń avtomattandyrylǵan aqparattyq júıesin (Qalakadastr júıesi) engizý arqyly qala qurylysy jobalarynyń iske asyrylýyn baqylaý jáne qala qurylysy qujattamasyna sáıkes kelmegen jaǵdaıda bastapqy-ruqsat berý qujattaryn berýge shekteý qoıý kózdelip otyr.
Sondaı-aq qurylys nysanyn salýdyń barlyq kezeńderinde derekterdiń ashyqtyǵyn jáne úzdiksiz salystyrmaly tekserilýin qamtamasyz etý maqsatynda nysanǵa biregeı nómir engiziledi.
Seısmıkalyq qaýipsizdik
Respýblıkada Qurylys kodeksine sáıkes seısmıkalyq táýekelderdi tómendetýge baǵyttalǵan jańa mindetti talaptar engiziledi.
Atap aıtqanda, seısmıkalyq qaýipsizdikti qamtamasyz etý boıynsha tómendegi sharalar bekitiledi:
- jobalaý kezinde seısmooqshaýlaǵysh júıelerdi qoldaný;
- qurylystyń barlyq kezeńderinde seısmıkalyq qaýiptilik pen táýekeldi baǵalaý;
- konstrýktıvtik júıelerdiń seısmoturaqtylyǵyna mindetti synaqtar júrgizý;
- seısmıkalyq qaýipti óńirlerdegi turǵyn jáne qoǵamdyq ǵımarattardy pasportızatsııalaý;
- jaýapkershiliktiń I deńgeıindegi nysandarǵa ınjenerlik-seısmometrııalyq stantsııalardy ornatý;
- seısmıkalyq faktorlardy jáne seısmıkalyq mıkroaımaqtarǵa bólý derekterin eskere otyryp, qurylys salýǵa arnalǵan eń qaýipsiz alańdardy tańdaý.
Lıtsenzıattardyń elektrondyq tizilimin engizý
Elde sáýlet, qala qurylysy jáne qurylys qyzmetine qatysýshylarǵa qoıylatyn talaptar kúsheıtilip, memlekettik aqparattyq júıelermen ıntegratsııalanǵan lıtsenzıattardyń elektrondyq tizilimi engiziledi.
Bul jalǵan qatysýshylardy boldyrmaý, salada tártip ornatý, lıtsenzııalyq talaptarǵa sáıkestikti avtomatty túrde tekserýdi qamtamasyz etý jáne sybaılas jemqorlyq táýekelderin barynsha azaıtý maqsatynda júzege asyrylady.
Sondaı-aq halyqaralyq tájirıbeni eskere otyryp, 2028 jyldan bastap sala ınjenerlerin sertıfıkattaý júıesin engizý josparlanyp otyr, atalǵan fýnktsııa básekeli ortaǵa beriletin bolady.
Tehnıkalyq normalaý jónindegi Ulttyq ınstıtýtty qurý
Qazaqstanda Tehnıkalyq normalaý jónindegi Ulttyq ınstıtýt qurylady.
Atalǵan ınstıtýt qurylys salasyndaǵy tehnıkalyq normatıvtik talaptardy ǵylymı zertteý, ázirleý, ózektendirý jáne súıemeldeý boıynsha, sondaı-aq olardy halyqaralyq standarttarmen úılestirý boıynsha biryńǵaı ortalyqqa aınalady.
Munda naqty baǵyttar boıynsha (qurylymdar, sáýlet, qala qurylysy, kólik, qubyr jelileri, sýmen jabdyqtaý jáne t.b.) naryqtan bilikti mamandardy tarta otyryp, salalyq tehnıkalyq komıtetter qalyptastyrylatyn bolady.
Qurylysqa baqylaýdy kúsheıtý jáne jaýapkershilikti arttyrý
Qurylys kodeksi aıasynda qurylysty baqylaýdy kúsheıtý jáne sala qatysýshylarynyń jaýapkershiligin arttyrý jónindegi sharalar iske qosylady.
Atap aıtqanda, tómendegi sharalar engiziledi:
- qurylystyń barlyq kezeńderinde jumystardyń bastalýynan bastap paıdalanýǵa berýge deıin Memlekettik sáýlet-qurylys baqylaýy (MSQB) organdary tarapynan jedel áreket etý jáne «josparly ınspektsııalaý» júrgizý;
- esepter men monıtorıng negizinde nysanǵa barmaı-aq júzege asyrylatyn qashyqtan (kameraldyq) baqylaý;
- zańsyz salynǵan nysandarǵa aýyrtpalyqtar (shekteýler) salý arqyly quqyqbuzýshylyqtar týraly ádilet organdaryn mindetti túrde habardar etý.
Sonymen qatar nysandardy paıdalanýǵa qabyldaý kezinde MSQB organdary men tótenshe jaǵdaılar jónindegi organdar (TJ organdary) qatysatyn bolady.
Sonymen qatar Ónerkásip jáne qurylys mınıstrligi qurylys jobalaryna júrgiziletin táýelsiz keshendi saraptama men qala qurylysy jobalaryna arnalǵan saraptama qunyn anyqtaý qaǵıdalaryn bekitýdi usyndy.