Jańa qýattar, gazdandyrý jáne jylý: Nurlybek Nálibaev Qaraǵandy oblysynyń negizgi jobalarymen tanysty
QARAǴANDY. KAZINFORM – Memleket basshysynyń tapsyrmalaryn iske asyrý aıasynda Premer-mınıstrdiń birinshi orynbasary Nurlybek Nálibaev Qaraǵandy oblysyna jumys saparymen baryp, óńirdegi negizgi mindetterdiń oryndalý barysyn tekserip, iri ındýstrııalyq jáne energetıkalyq jobalardyń damýymen tanysty.
Negizgi nazar ónerkásiptik kásiporyndardy jańǵyrtý, jylytý maýsymyna daıyndyq, jylý energetıkasyn damytý jáne gazdandyrý máselelerine aýdaryldy.
Temirtaýda Premer-mınıstrdiń birinshi orynbasary Qarmet metallýrgııalyq kombınatyna baryp, óndiristik úderistermen jáne kásiporyndy jańǵyrtý baǵdarlamasymen tanysty.
– Domna peshterin tabıǵı gazǵa kóshirý mazýtty tolyqtaı paıdalanýdan shyǵarýǵa, agregat jumysynyń turaqtylyǵyn arttyrýǵa jáne qorshaǵan ortaǵa áserdi azaıtýǵa múmkindik berdi, - dedi Qarmet Corporation basqarma tóraǵasy Petr Trýshın.
Sondaı-aq Nurlybek Nálibaevqa kombınattaǵy jańa óndiristik nysandardyń qurylysy týraly baıandaldy.
2025 jyldyń qorytyndysy boıynsha kásiporyn 3,8 mln tonna bolat óndirdi. «5–9–5» strategııasy aıasynda 2028 jylǵa qaraı kompanııa 5 mln tonna bolat, 9 mln tonna kómir jáne 5 mln tonna temir keni kontsentratyn shyǵara otyryp, óndiristi arttyrýdy josparlap otyr.
Sapardyń jeke baǵyty 2026–2027 jyldardaǵy jylytý maýsymyna daıyndyq pen Temirtaý men Qaraǵandynyń energetıkalyq ınfraqurylymyn jańǵyrtý jumystaryn tekserýge arnaldy.
– Aldaǵy jylytý maýsymynda esh problema bolmaýy tıis. 1 qyrkúıekke deıin barlyq nysandar boıynsha daıyndyq pasporttary alynýy qajet. Jylytý kezeńinde irkiliske jol berýge bolmaıdy, – dep atap ótti Nurlybek Nálibaev.
Vıtse-premer sondaı-aq Qaraǵandy JEO-3 stantsııasyndaǵy jóndeý jumystarynyń barysymen jáne stantsııany keńeıtý jobasymen tanysty. Jańa energetıkalyq blok elektr qýatyn 140 MVt-qa, al jylý qýatyn 180 Gkal/saǵ-qa arttyrýǵa múmkindik beredi.
– JEO-3-ti keńeıtý – óńirdegi iri ınfraqurylymdyq jobalardyń biri. Jumys aıaqtalǵannan keıin qosymsha qýat qory qurylyp, 400-den astam turǵyn úı men áleýmettik nysandardy jylýmen qamtamasyz etý múmkindigi artady, – dedi «Qaraǵandy Energotsentr» JShS bas dırektory Flıýr Garıpov.
Sapar barysynda Qaraǵandyny gazdandyrý máseleleri de qaraldy. Bıyl jobanyń birinshi kezeńin aıaqtaý josparlanǵan.
– Birinshi kezeń boıynsha gaz 10 myńnan astam abonentke jetkiziledi. Bul jumystar aıaqtalǵannan keıin ekinshi kezeńge kóshemiz – ol Prıshahtınsk, Maıqudyq jáne Suryptaý aýdandary, – dedi Qaraǵandy qalasynyń ákimi Meıram Kojýhov.
Óńirdiń ındýstrııalyq damýy aıasynda Nurlybek Nálibaev birqatar óńdeý ónerkásibi kásiporyndaryn aralady.
«TEMPO Qazaqstan» zaýytynda oǵan bolat tik jikti qubyrlar shyǵaratyn jańa óndiristik jeli tanystyryldy. Dıametri 630 mm qubyrlardy kúıdirý jáne shyńdaý tehnologııasy ónimdi −60 pen +60 gradýs temperatýra aralyǵynda paıdalanýǵa múmkindik beredi. Mundaı óndiristiń balamasy Qazaqstanda joq.
Silk Road Electronics kásipornynda vıtse-premer turmystyq tehnıka óndirisimen jáne jergilikti jerge shoǵyrlandyrý baǵdarlamasymen tanysty. Búginde zaýytta kir jýǵysh mashınalar, shańsorǵyshtar, boılerler, as úı plıtalary, teledıdarlar jáne sorǵyshtar shyǵarylady.
– Qazir kásiporynda shamamen 300 adam jumys isteıdi. Jylyna 1 mln ónimge deıin óndiretin tolyq qýatqa shyqqannan keıin qyzmetkerler sany 800 adamǵa deıin artady, – dedi kompanııanyń operatsııalyq dırektory Talǵat Ábdirahmanov.
Sondaı-aq Premer-mınıstrdiń birinshi orynbasary QazTehna jáne Tengri Tyres kásiporyndaryna baryp, avtobýs, arnaıy tehnıka jáne avtokólik shınalary óndirisimen jáne qýattardy keńeıtý josparlarymen tanysty.
– Memleket basshysy men Úkimettiń tapsyrmasy boıynsha biz óńirlerdi aralap júrmiz. Qaraǵandy oblysynda kóptegen mańyzdy jobalar júzege asyrylyp jatyr, júzdegen adam eńbek etetin iri óndiris oryndary jumys isteıdi. Kásiporyndardyń tolyqqandy óndiris quryp, ári qaraı damýǵa umtylyp otyrǵanyn kórdik, – dedi Nurlybek Nálibaev.
Jumys saparynyń qorytyndysy boıynsha vıtse-premer ónerkásiptik jáne energetıkalyq jobalardyń júzege asyrylýy Qaraǵandy oblysynyń damýy úshin mańyzdy faktorlardyń biri ekenin atap ótti.
