Jańa kýálikte nelikten týǵan óńirdiń ornyna týǵan el kórsetilip júr
ASTANA. KAZINFORM — Jańa kýálik alǵan Qazaqstan azamattary «týǵan jeri» baǵanynda eldiń ataýy kórsetilgenin aıtyp júr. QR Іshki ister mınıstrligi qujatqa engizilgen ózgeristerdi túsindirdi, dep habarlaıdy Kazinform agenttigi.
Іshki ister mınıstrliginiń baspasóz qyzmetiniń habarlaýynsha, ózgeris 2025 jyldyń naýryz aıynda kúshine engen. «Týǵan jeri» baǵanynda endi qala nemese eldi meken emes, tek eldiń ataýy jazylady.
Sondyqtan, Qazaqstanda týǵan azamattardyń jeke kýálikterinde «Qazaqstan» dep kórsetiledi. Shetelde dúnıege kelgen azamattardyń da týǵan jeri retinde sol eldiń ataýy jazylady.
Mysaly, eger Qazaqstan azamaty AQSh-ta týǵan bolsa, onyń týǵan jeri — «AQSh».
Іshki ister mınıstrligi bul sheshim qujattaý protsesin jetildirý jáne ony halyqaralyq tájirıbege sáıkestendirýmen baılanysty ekenin túsindirdi.
Al, azamattyń týǵan jeri, ıaǵnı oblys, aýdan jáne qala týraly tolyq aqparat tsıfrlyq júıede saqtalady. Agenttik azamattarǵa bul ózgeriske baılanysty aǵymdaǵy jeke kýálikterin aýystyrýdyń qajeti joq ekenin atap ótti.
2026 jyldyń birinshi jartyjyldyǵynda Qazaqstanda 1,5 mln-nan astam azamat tólqujat pen jeke kýálik alǵan.
Buǵan deıin Qazaqstan Іshki ister mınıstrligi áleýmettik jelilerde JSN ózgertý múmkindigi týraly taralǵan aqparatty da túsindirgen bolatyn.
