Jańa kitaphanalar, UEFA arenasy, «Qazaqstan» sport kesheni: elordada qandaı nysandar salynyp jatyr

ASTANA. KAZINFORM – Astanada jyl sońyna deıin qandaı mádenı nysandar paıdalanýǵa beriledi? «Qazaqstan» sport keshenin qaıta jańǵyrtý jumystary qalaı júrip jatyr? Osy saýaldarǵa jaýap izdep, qala ákimdigine resmı saýal joldaǵan edik.

Mádenıet basqarmasynyń habarlaýynsha, jyl sońyna deıin qalada oqý men aralasýǵa arnalǵan eki jańa zamanaýı alań ashylady. Jańa kitaphanalar Saraıshyq aýdanyndaǵy A91 kóshesinde jáne Baıqońyr aýdanyndaǵy K.Imanov kóshesinde boı kótermek. Bıyl Esil aýdanynda jańa kitaphana ashylyp, taǵy úsh qalalyq kitaphana jańǵyrtyldy.

Osylaısha, elordada ákimdikke qarasty kitaphanalardyń jalpy sany 25-ke jetedi.

- Kitap oqýǵa degen qyzyǵýshylyqtyń qaıta oralǵanyn baıqap otyrmyz. Jańa kitaphanalar tek kitap saqtaıtyn oryn emes, barlyq jastaǵy turǵyndarǵa arnalǵan zamanaýı mádenı ortalyqqa aınalyp jatyr, - dedi basqarmadan.

Oqyrmandar sany 80 myńnan 90 myńǵa deıin ósti, al kitap qory 750 myń danaǵa jetti.

Ákimdik ókilderi Qajymuqan Muńaıtpasuly atyndaǵy Ortalyq stadıonnyń ornynda boı kóteretin jańa arenanyń egjeı-tegjeıin de aıtty. Stadıon 1936 jyly salynǵan, eski ǵımarat apatty jaǵdaıda dep tanylyp, tolyqtaı buzyldy.

Jańa arenanyń jalpy aýdany – 18 950 sharshy metr. Inklıýzıv qaǵıdattaryna sáıkes, múmkindigi shekteýli azamattarǵa arnalǵan oryndar qarastyrylǵan.

- Keshenniń syıymdylyǵy 3 598 oryn, fýtbol alańynyń ólshemi 105×68 metr, ol Qazaqstan fýtbol federatsııasynyń klassıfıkatsııasy boıynsha IV sanatqa saı keledi, - dep málimdedi elordanyń dene shynyqtyrý jáne sport basqarmasy.

Jańa arena UEFA-nyń halyqaralyq standarttaryna tolyq sáıkes bolady, ol joǵary deńgeıdegi jarystar men halyqaralyq týrnırler ótkizýge múmkindik beredi. Munda kórermender men sportshylarǵa arnalǵan jaıly aımaqtar, zamanaýı ınjenerlik júıe men buqaralyq is-sharalarǵa arnalǵan alańdar salynady.

«Qazaqstan» sport keshenine kelsek, onyń qaıta jańǵyrtý jalǵasyp jatyr. Atalǵan nysannyń taǵdyry birneshe jyldan beri qala turǵyndarynyń erekshe nazarynda. Jańartý jumystarynan keıin keshenniń jalpy aýdany 37 664,3 sharshy metr zamanaýı kópfýnktsıonaldy ortalyqqa aınalady.

2000 jyly salynǵan ǵımarat kúrdeli jóndeýdi qajet etken. Birneshe jyl buryn sport kesheniniń tek qańqasy qalǵan edi, al Almaty aýdanynyń turǵyndary elordanyń eń tanymal sport nysandarynyń biri qaıta jandanady dep kútedi.

Negizgi muz aıdyny transformer jappamen jabdyqtalady, demek sporttyq ta, mádenı is-sharalar da ótkizýge múmkindik. Qaıta jóndeýden keıin muz aıdynynyń syıymdylyǵy 6 000 oryn, basseınniń syıymdylyǵy 1 200 oryn, al jyljymaly trıbýnalarǵa qosymsha 1 000 oryn qosady.

Elorda ákimdiginiń habarlaýynsha, jańartylǵan keshen qala turǵyndary men qonaqtary úshin jańa tartylys ortalyǵyna aınalmaq.

Aıta ketsek, Astana qalasynda Respýblıka kúni qarsańynda jańa №7 balalar kitaphanasy ashyldy. 

Eske salaıyq, búginde elimizde ÝEFA standarty boıynsha salynǵan úshinshi stadıon ashyldy. 

Elordadaǵy Muńaıtpasov stadıony men «Qazaqstan» sport saraıynyń qurylysy máselesin buǵan deıin de jazǵan edik.