Jańa qosymsha keshikken reıster úshin ótemaqy alýdy jeńildetedi
ASTANA. QazAqparat - Búgin QR IDM Azamattyq avıatsııa komıteti men Astana qalasynyń Avıatsııalyq kólik prokýratýrasy arasynda ózara yntymaqtastyq jónindegi memorandýmǵa qol qoıyldy, dep habarlaıdy mınıstrliktiń baspasóz qyzmeti.
Memorandýmǵa sáıkes, taraptar tutynýshylardyń quqyǵy salasynda zań buzýshylyqtarǵa jol bermeýge jáne áýe jolaýshylaryna qolaıly (jaıly) jaǵdaı jasaýǵa baǵyttalǵan yntymaqtastyqty jalǵastyrýǵa kelisti.
Memorandým sheńberinde taraptar «Air Help» aqparattyq jobasyn engizýdi qarastyrý boıynsha birikken is-sharalar josparyn qabyldandy.
«Air Help» jobasy mobıldi qosymshasy bar telefondy paıdalana otyryp, jolaýshylardyń quqyǵyn qorǵaýdy jaqsartýǵa baǵyttalǵan. Onyń kómegimen áýe jolaýshylary reıster keshikkende nemese shyqpaı qalǵanda aqshasyn ótep alý máselesin sheshe alatyn bolady. Áýe jolaýshysy óz quziretin zańdyq negizde paıdalanyp, 3 mınýt ishinde mobıldi qosymshany qoldaný arqyly ótinimdi toltyryp (talapty rásimdeý), kompanııaǵa beredi. Odan keıin tek bılet qunynyń ótemin kútedi. «Air Help» tek talap qanaǵattandyrylǵan jaǵdaıda ǵana qyzmeti tólemin alady. Qyzmettiń tólemi áýe kompanııadan alynǵan somadan ustalady», - delingen baspasóz baıanynda.
