Jańa qosalqy stantsııa: elordanyń 80 myń turǵyny senimdi elektrmen qamtamasyz etildi
ASTANA. KAZINFROM — Astanada «Araı» atty jańa tómendetkish qosalqy stantsııa paıdalanýǵa berildi. Sharaǵa QR Energetıka mınıstrligi, qala ákimdigi, qoǵam ókilderi men BAQ qatysty. Bul týraly vedomstvonyń bapsasóz qyzmeti málim etti.
— Jańa qosalqy stantsııa elektr energetıkasy salasyndaǵy zamanaýı tehnıkalyq sheshimder negizinde salynǵan. Joba aıasynda jalpy qýaty 80 MVA bolatyn 110/20 kV eki kúshtik transformator ornatylyp, uzyndyǵy 11 km-den asatyn 110 kV joǵary kerneýli kabel jelileri tartyldy, — delingen habarlamada.
Jobany iske asyrý nátıjesinde bolashaǵy zor qurylys aýdanynda ornalasqan 80 myńnan astam turǵyn, sondaı-aq mektepter, balabaqshalar, aýrýhanalar sııaqty áleýmettik nysandar jáne Turan dańǵylynyń batysyndaǵy, Uly Dala dańǵyly boıyndaǵy aýmaq senimdi ári sapaly elektr qýatymen qamtamasyz etildi.
«Araı» qosalqy stantsııasynyń jobasy — elordanyń energetıkalyq ınfraqurylymyn damytý strategııasynyń mańyzdy bóligi bolyp tabylady. Ol elektrmen jabdyqtaý senimdiligin arttyrýǵa, qala turǵyndarynyń ómir súrý sapasyn jaqsartýǵa jáne Astananyń týrıstik áleýetin damytýǵa baǵyttalǵan.
Eske sala keteıik, buǵan deıin qoldanystaǵy moratorıı aıasynda elektr energııasyna shekti tarıfter ózgerissiz qalǵanyn jazǵan edik.