Jańa Qorǵanys mınıstri armııada qandaı ózgeris bolatynyn aıtty
ASTANA. KAZINFORM — Qorǵanys mınıstri, general-maıor Aıdos Myrzahmetov Qorǵanys mınıstrliginiń basshylyq quramymen alǵashqy jumys keńesin ótkizdi. Jıynda Qarýly kúshterdi odan ári damytý jáne reformalaý baǵytyndaǵy negizgi mindetter aıqyndaldy.
Basty nazar Memleket basshysy — QRQarýly kúshteriniń Joǵarǵy Bas qolbasshysy bergen armııany keshendi jańǵyrtý jónindegi tapsyrmalardy iske asyrýǵa aýdaryldy. Bul rette zamanaýı qaýip-qaterler, qarýly qaqtyǵystardyń tájirıbesi, áskerı tehnologııalardyń qarqyndy damýy jáne áskerı qyzmettiń qaýipsizdigin qamtamasyz etý máseleleri eskeriledi.
Negizgi basymdyq áskerlerdiń naqty jaýyngerlik ázirligin arttyrýǵa, basqarý júıesin jetildirýge, jaýyngerlik daıarlyqtyń sapasyn kóterýge jáne qarý-jaraq pen áskerı tehnıkany damytýǵa baǵyttalatyn bolady.
Áskerı qyzmetshilerdiń moraldyq jáne jaýyngerlik rýhyn nyǵaıtý ózgeristerdiń mańyzdy baǵyttarynyń biri retinde aıqyndalyp otyr. Komandırlerge áskerı ujymdarda salaýatty moraldyq-psıhologııalyq ahýal qalyptastyrý, tárbıe jumysynyń sapasyn arttyrý, sondaı-aq jeke quramnyń qyzmet etý jaǵdaılaryn jaqsartý jóninde mindetter júkteldi. Áskerı qyzmettiń qaýipsizdigin qamtamasyz etýge, jarǵyǵa jat qarym-qatynastardyń aldyn alýǵa jáne olarǵa qatań túrde jol bermeýge erekshe nazar aýdarylýy tıis.
Mınıstr áskerı qyzmetshilerdi daıarlaý tásilderin qaıta qaraýdyń qajettigin atap ótti. Oqytý qazirgi zamanǵy urys qımyldaryn júrgizý jaǵdaıyna barynsha sáıkes kelip, praktıkalyq tájirıbege, zamanaýı qaqtyǵystardy taldaýǵa negizdelýi kerek. Sonymen qatar ushqyshsyz júıelerdi, radıoelektrondyq kúres quraldaryn, barlaý, baılanys jáne basqa da jańa tehnologııalardy qoldanýdyń zamanaýı tásilderi eskerilýi qajet.
Áskerı bólimshelerdi ózderine júktelgen mindetterdi oryndaýǵa daıyndaýǵa erekshe nazar aýdaryldy. Komandırlerge jeke quramnyń joǵary deńgeıdegi daıarlyǵyn, bólimshelerdiń úılesimdi is-qımylyn jáne ártúrli jaǵdaılarda áreket etýge turaqty ázirligin qamtamasyz etý tapsyryldy.
Áskerlerdi basqarý júıesin jetildirý de reformanyń jeke baǵytyna aınalmaq. Bul rette úderisterdi odan ári tsıfrlandyrý, basy artyq ákimshilik rásimderdi, eseptilik pen praktıkalyq mańyzy joq keńesterdi qysqartý kózdelip otyr. Bosatylǵan resýrstar áskerlerdiń jaýyngerlik qabiletin arttyrýǵa tikeleı baǵyttalýy tıis.
Armııany materıaldyq-tehnıkalyq qamtamasyz etý júıesin jetildirý jumystary jalǵasa beredi. Bul rette satyp alý jáne resýrstardy bólý áskerlerdiń naqty qajettilikteri men jaýyngerlik daıarlyqtyń basym baǵyttaryn eskere otyryp, júzege asyrylýy tıis. Mınıstr bıýdjet qarajatyn utymdy ári tıimdi paıdalanýdy qamtamasyz etýdi, tıimsiz shyǵyndarǵa jol bermeýdi jáne qabyldanatyn sheshimderdiń ashyqtyǵyn arttyrýdy tapsyrdy.
— Armııa eseptik kórsetkishter men kózboıaýshylyq is-sharalar úshin emes, naqty nátıjege qol jetkizý úshin damýy kerek. Árbir úderis, árbir sheshim jáne bólingen árbir resýrs praktıkalyq nátıjege ıe bolyp, Qarýly kúshterdiń jaýyngerlik qabiletin arttyrýǵa baǵyttalýy tıis. Árbir sarbaz ózin qaýipsiz sezinýi kerek, — dep atap ótti Qorǵanys mınıstri.
Keńes barysynda Memleket basshysynyń tapsyrmasy boıynsha júrgizilip jatqan Qorǵanys mınıstrliginiń qyzmetine keshendi tekserý barysy da qaraldy. Qurylymdyq bólimshelerdiń basshylaryna komıssııa jumysyna qajetti qoldaý kórsetip, talap etilgen barlyq aqparatty usyný tapsyryldy.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
25 qyrkúıekte, saǵat 9:15 shamasynda úzdiksiz júrgizilgen izdestirý-qutqarý jumystary nátıjesinde eki sarbazdyń denesi sýdan shyǵaryldy. Osylaısha teńiz-áskerı kúshteriniń 14 áskerı qyzmetshisi qaza boldy.
Prezıdent Qorǵanys mınıstrligindegi jaǵdaıdy tekseretin komıssııa qurǵan edi. Komıssııa júrgizilgen jumystyń alǵashqy nátıjeleri týraly jeti kún ishinde baıandaýǵa tıis.
Qyzmetke salǵyrt qarady, korabl júrgizý qaǵıdalaryn buzý boıynsha aýyr zardaptarǵa ákep soqqan qylmystyq quqyq buzýshylyqtar jasady degen kúdikpen Qazaqstan Respýblıkasy Qarýly Kúshteriniń joǵary jáne aǵa komandalyq quramyndaǵy jaýapty laýazymdy tulǵalar ustalǵan bolatyn.
26 qyrkúıekte Mańǵystaý jurty qaza tapqan sarbazdardy sońǵy saparǵa shyǵaryp saldy.
Prezıdent Dáýren Qosanovty Qorǵanys mınıstri laýazymynan bosatty. Onyń ornyna Aıdos Myrzahmetov Qorǵanys mınıstri bolyp taǵaıyndaldy. Toqaev jańa mınıstrge áskerı basqarý júıesin jetildirýdi tapsyrdy.
