Jańa kópir, avtojoldar, qoǵamdyq kólikter — Taraz qalasy qalaı túrlenedi

ASTANA. KAZINFORM — Jambyl oblysynyń ákimi Erbol Qarashókeev oblys ortalyǵy Taraz qalasyn damytý jumystary týraly aıtyp berdi.

Taraz qalasynda Abaı dańǵylynyń boıynda temirjol arqyly ótetin jańa kópir salynyp jatyr. Bul Taraz qalasynyń turǵyndary úshin kólik logıstıkasyn edáýir jaqsartýǵa, avtokólik qozǵalysynyń tıimdiligin arttyrýǵa jáne kólik qaýipsizdigin qamtamasyz etýge múmkindik beredi.

— Jańa turǵyn úı alqaptaryn qala ortalyǵymen baılanystyrý úshin 50 shaqyrym avtojol salyndy. Jalpy uzyndyǵy 10,3 shaqyrymdy quraıtyn 3 kóshe qaıta jańǵyrtyldy, 35,3 shaqyrym jaıaý júrginshi joldary jabdyqtaldy, 49,6 shaqyrym sýarý aryqtary jóndeldi, — dedi E. Qarashókeev Ortalyq kommýnıkatsııalar qyzmetinde.

Sońǵy eki jylda 271 zamanaýı avtobýstar satyp alynyp, Taraz qalalyq avtokólik parki 82%-ǵa jańartylǵan.

— Ǵımarattardyń syrtqy sáýlettik kelbetine biregeı jáne zamanaýı talaptardy qalyptastyrý úshin 15 eski kópqabatty úıdiń syrty qaıta jańǵyrtyldy. Kópqabatty úılerdiń aýlasynda 27 balalar oıyn alańy ornatyldy. Oǵan qosa, 514 aýla jáne 85 kóshege jaryq shamdary júrgizildi, — dedi oblys ákimi.

Buǵan deıin ákim oblysta 6 jasar bala óliminen keıin bas dáriger jumysynan bosatylǵanyn aıtqan edi.

Jyl sońyna deıin 24 aýyldyq eldi meken jáne Taraz, Shý, qalalarynyń 9 turǵyn alqaby aýyz sýmen qamtamasyz etiledi.