Jańa Konstıtýtsııanyń jobasynda «Prezıdent» bólimine múlde jańa erejeler endi
ASTANA. KAZINFORM — Respýblıka Prezıdentin merziminen buryn laýazymynan bosatý negizderi men tártibin retteıtin konstıtýtsııalyq erejeler tolyqtyryldy. Bul týraly Konstıtýtsııalyq reformalar jónindegi komıssııanyń otyrysynda Konstıtýtsııalyq Sot tóraǵasynyń orynbasary Baqyt Nurmuhanov málim etti.
— Jańa Konstıtýtsııanyń jobasyndaǵy úshinshi «Prezıdent» bólimine tujyrymdamalyq turǵydan qaıta qaralǵan jáne múlde jańa erejeler endi. Onda el Prezıdenti memlekettik bıliktiń barlyq tarmaǵynyń úılesimdi ári kedergisiz jumys isteýin, bılik organdarynyń Qazaqstan Respýblıkasynyń birtutas halqynyń aldyndaǵy jaýapkershiligin qamtamasyz etedi, degen norma qarastyryldy. Respýblıka Prezıdentine úmitkerlerge talaptar naqtylandy. Eń joǵary laýazymdy tulǵa bolyp týmysynan Qazaqstan Respýblıkasynyń azamaty bolyp tabylatyn, qyryq jasqa tolǵan, memlekettik tildi erkin meńgergen, Qazaqstanda sońǵy on bes jyl boıy turatyn, joǵary bilimdi jáne memlekettik qyzmette, saılanbaly memlekettik laýazymdarda keminde bes jyl tájirıbesi bar Qazaqstan azamaty saılana alady, — dedi Baqyt Nurmuhanov.
Onyń aıtýynsha, jekelegen normalar prezıdentti saılaý naýqanyn ótkizý jáne ant berý merzimderin bekitedi. Prezıdenttiń Quryltaımen, Úkimetpen jáne basqa memlekettik organdarmen ózara is-qımylyna, kadrlyq máselelerge, normashyǵarmashylyq fýnktsııalaryna qatysty ókilettikterin retteıtin erejeler endi.
— Respýblıka Prezıdentin merziminen buryn laýazymynan bosatý negizderi men tártibin retteıtin konstıtýtsııalyq erejeler tolyqtyryldy. Memleket basshysynyń óz erkimen ornynan túsýge quqyǵy naqty jazylyp otyr. Ondaı rásimder Konstıtýtsııalyq Sot arqyly júretin bolady. Ary qaraı Prezıdent ókilettikteriniń belgilengen tártippen Konstıtýtsııada anyqtalǵan laýazymdy tulǵalarǵa — Vıtse-Prezıdentke, Quryltaı tóraǵasyna nemese Premer-mınıstrge ótý rásimderi bastalady. Olardy retteıtin normalar da naqtylandy. Respýblıka Prezıdentiniń ókilettigin qabyldaýdan bas tartý jóninde sheshim qabyldaǵan tulǵa Konstıtýtsııalyq Sotqa tıisti ótinish beredi. Konstıtýtsııalyq Sot osy tulǵanyń ótinishti ózi jáne óz erkimen bergenin rastaıtyn qorytyndy beredi. Respýblıka Prezıdenti laýazymynan merziminen buryn bosatylǵan, ketirilgen nemese qaıtys bolǵan kúnnen bastap jeti kún ishinde Quryltaı prezıdent saılaýyn ótkizý týraly jarııalaıdy. Ol saılaý eki aı ishinde ótkiziledi, degen normalar usynylyp otyr, — dedi Konstıtýtsııalyq Sot tóraǵasynyń orynbasary.
Aıta ketelik Jańa Konstıtýtsııanyń sońǵy nusqasynda 95 bap bolady.