Jańa Konstıtýtsııanyń jobasy – tuńǵysh ret myńjyldyq tarıhymyz basty qundylyq retinde aıqyndaldy

ASTANA. KAZINFORM – Jańa Konstıtýtsııa jobasynyń preambýlasynda el tarıhy alǵash ret basty qundylyqtardyń biri retinde naqty kórsetildi.

Atap aıtqanda, qujattyń kirispe bóliminde «Uly Dalanyń myńdaǵan jyldyq tarıhynyń sabaqtastyǵyn saqtap» degen tirkestiń engizilýi – tarıhı sanany jańǵyrtý men ult jadynyń úzdiksizdigin qamtamasyz etýge baǵyttalǵan mańyzdy qadam retinde baǵalanyp otyr.

Joba mátininde tarıh máselesi birqatar bapta da kórinis tapqan. Atap aıtqanda, 3-bapta Qazaqstan Respýblıkasy qyzmetiniń negizin quraıtyn qaǵıdattar qatarynda tarıhı-mádenı murany saqtaý jáne tól mádenıetti qoldaý mindetteri aıqyndalǵan.

Bul bapta Egemendik pen Táýelsizdikti qorǵaý; adamnyń jáne azamattyń quqyqtary men bostandyqtaryn saqtaý; zań men tártip ústemdigin qamtamasyz etý; jalpyulttyq birlikti bekemdeý; halyqtyń ál-aýqatyn arttyrý; jaýapty ári jasampaz otanshyldyq ıdeıasyn ilgeriletý; qoǵamdyq dıalogty damytý; eńbeksúıgishtik, progress, bilim qundylyqtaryn bekitý; joǵary ekologııalyq mádenıetti qalyptastyrý; tarıhı-mádenı murany saqtaý normasy da qamtylǵan.

Sondaı-aq 40-bapta Qazaqstan Respýblıkasynyń azamattary tarıhı jáne mádenı muranyń saqtalýyna qamqor bolýǵa, tarıh pen mádenıet eskertkishterine uqypty qaraýǵa mindetti ekeni kórsetilgen.

Osylaısha, jańa Konstıtýtsııa jobasynda ulttyq tarıh pen mádenı murany saqtaý máselesi memlekettik saıasattyń ózekti baǵyttarynyń biri retinde aıqyndalyp otyr.

Aıta keteıik, Halyq jerdiń tarıhı ıesi bolsa, egemendik pen memlekettilikke de zańdy quqyǵy bar. Bul halyqaralyq quqyqtaǵy qaǵıda. Osy turǵydan qaraǵanda, jańa Konstıtýtsııa jobasy kirispesiniń ózi mańyzdy.