Jańa Konstıtýtsııanyń sońǵy nusqasynda 95 bap bolady
ASTANA. KAZINFORM — Jańa Konstıtýtsııanyń sońǵy nusqasynda 95 bap bolady. Bul týraly Konstıtýtsııalyq reforma jónindegi komıssııanyń 6-otyrysynda Konstıtýtsııalyq sot tóraǵasy Elvıra Ázimova aıtty.
— Jańa Konstıtýtsııanyń sońǵy nusqasyn pysyqtaý týraly kelisimge kelgen bolǵanbyz. Atap aıtsaq, jobaǵa usynylǵan normalar Ata zańnyń barlyq bólimin qamtyp, 77 bapqa túzetýler engizý usynyldy. Bul Konstıtýtsııa mátininiń 84 paıyzyn qurady. Konstıtýtsııa jańa qurylymda usynylyp otyr. Oǵan jańa redaktsııadaǵy Preambýla, 95 baptan turatyn 11 bólim kiredi. Sonymen birge 4 bólim múldem jańa ataýlarmen beriledi. Pysyqtalǵan Konstıtýtsııanyń jańa jobasy búgin sizderge usynylady.
Aıta ketý kerek 2025 jyly qazan aıynan bastalǵan aýqymdy jumys nátıjesinde Qazaqstannyń kontseptýaldy jańa Konstıtýtsııanyń jańa jobasy qalyptastyrylady. Ótken otyrystar barysynda komıssııa músheleri redaktsııalyq sıpattaǵy birqatar usynys engizdi, — dedi otyrysty ashqan komıssııa tóraǵasy Elvıra Ázimova.
Qazirgi ýaqytta Konstıtýtsııalyq sot tóraǵasynyń orynbasary Baqyt Nurmuhanov Qazaqstannyń jańa Konstıtýtsııasynyń jobasyn tanystyryp jatyr.
Buǵan deıingi komıssııanyń 4-otyrysynda jańa Konstıtýtsııa Preambýla, 11 bólim jáne 104 baptan turatyny, 2 jańa bólim paıda bolatyny aıtylǵan edi.