Jańa Konstıtýtsııanyń ózeginde adam quqyǵy men bostandyǵy tur — Ádilet mınıstri
ASTANA. KAZINFORM — Jańa Konstıtýtsııa adamnyń ómiri, quqyqtary men bostandyqtaryn memlekettiń basty qundylyǵy retinde aıqyndap, olardy qorǵaýdyń quqyqtyq kepildikterin edáýir keńeıtti. Bul týraly Úkimet otyrysynda Ádilet mınıstri Erlan Sársembaev aıtty.
Mınıstrdiń aıtýynsha, búginnen bastap jańa Konstıtýtsııanyń erejeleri elimizdiń quqyqtyq júıesiniń, memlekettik bılik ınstıtýttarynyń qyzmeti men uzaq merzimdi qoǵamdyq damýdyń negizgi irgetasyna aınalady.
Jańa Konstıtýtsııamen bekitilgen Ádiletti Qazaqstan ıdeıasynyń ózeginde adam, onyń ómiri, quqyqtary men bostandyqtary ornalasqan.
— Adamǵa baǵdarlanǵan qaǵıdatqa sáıkes, Konstıtýtsııada adam quqyqtarynyń kepildikteri edáýir keńeıtildi. Alǵash ret Negizgi Zań deńgeıinde azamattardyń jaǵdaıyn nasharlatatyn zańdarǵa keri kúsh berýge tikeleı tyıym salyndy. Bul quqyqtyq aıqyndyqty kúsheıtip, qoǵamnyń zańdarǵa degen senimin arttyrady, — dedi mınıstr Úkimettiń búgingi otyrysynda.
Qoǵamnyń tsıfrlyq damý jaǵdaıynda adamnyń derbes derekterin qorǵaý konstıtýtsııalyq deńgeıde bekitildi. Sondaı-aq ár azamatqa memlekettiń zańsyz áreketinen kelgen zııandy ótetip alý quqyǵy konstıtýtsııada aıqyn kórsetildi.
— Osyndaı jáne ózge de erejeler adam quqyqtaryn qorǵaýdyń kepildikterin kúsheıtip qana qoımaı, zańnamanyń tıisti salalaryn odan ári jetildirýdi talap etedi, — dedi E. Sársenbaev.
Aıta keteıik, búgin jańa Konstıtýtsııa kúshine endi. Jalpyhalyqtyq referendým nátıjesinde qabyldanǵan tarıhı qujat memlekettik basqarý júıesin, qoǵamnyń damý baǵytyn túbegeıli ózgertpek.
Prezıdent qazaqstandyqtardy Jańa Konstıtýtsııanyń kúshine enýimen quttyqtady.
Sondaı-aq Premer-Mınıstr Oljas Bektenov barlyq memlekettik jáne qoǵamdyq ınstıtýttardy túbegeıli jańǵyrtý bastalǵanyn aıtqan edi.
