Jańa Konstıtýtsııanyń óńirler úshin praktıkalyq mańyzy zor – Qyzylorda oblysynyń ákimi

ASTANA. KAZINFORM – Qyzylorda oblysynyń ákimi Nurlybek Nálibaev Konstıtýtsııalyq reforma jónindegi komıssııanyń búgingi otyrysynda Ata zańnyń jańa nusqasynda ekologııany qorǵaýǵa basymdyq berilgenin atap ótti.

- Jańa Konstıtýtsııanyń praktıkalyq mańyzy zor. Qujatta ákimdikter kúndelikti jumys barysynda betpe-bet keletin máseleler qamtylǵan. Bul – sý men jer resýrstaryn tıimdi paıdalaný, ekologııalyq jaǵdaı, áleýmettik qorǵaý, bilim berý, aımaqtardyń turaqty damýyn qamtamasyz etý. Konstıtýtsııa jobasy biz úshin eń aldymen sheshimder qalaı qabyldanatynyn, onyń júzege asyrylýyna memleket qandaı mindet alatynyn aıqyndaıdy. Sonymen qatar, memlekettiń egemendigin nyǵaıtýǵa, azamattar aldyndaǵy jaýapkershiligin arttyrýǵa baǵyttalǵan tyń tustaryn erekshe atap ótý qajet. Mańyzdy qujatta ásirese ekologııalyq qaýipsizdik máselelerine aıryqsha mán berilgen. Qyzylorda oblysy úshin bul normalardyń mańyzy óte zor, - dedi ákim.

Sondaı-aq, ol Araldy qutqarý barsha adamzat úshin áli de óte ózekti mindet ekenin eske saldy.

- Aral teńiziniń taǵdyry – aýyr sabaq. Onyń saldaryn búginge deıin sezinip kelemiz. Memlekettiń qolaıly qorshaǵan ortany qamtamsyz etý mindetin, azamattardyń ekologııalyq qaýipsizdikke baılanysty quqyǵyn, adamdardyń ómiri men densaýlyǵyna qaýip tóndiretin aqparat úshin artylatyn jaýapkershilik týraly normalardy biz tolyq ári sanaly túrde qoldaımyz. Bul bizdiń óńir úshin tek jalpylama aıtylǵan urandy sóz emes, bolashaq úshin mańyzdy aıryqsha quqyqtyq kepil bolyp otyr, - dedi Nurlybek Nálibaev.

Aıta keteıik, Kazinform agenttiginiń qazaq jáne orys tilindegi Telegram arnasy osy otyrystan mátin translıatsııasyn berip jatyr.