Jańa Konstıtýtsııanyń negizinde Ádiletti Qazaqstan tujyrymdamasy jatyr
ASTANA. KAZINFORM – M. Nárikbaev ýnıversıteti janyndaǵy Quqyq joǵary mektebiniń professory, PhD doktory Marat Ahmadıdiń aıtýynsha, jańa Konstıtýtsııanyń negizinde Ádiletti Qazaqstan tujyrymdamasy jatyr. Onyń basty ózegi – ádilettilik qaǵıdatyn ornyqtyryp, adam quqyqtaryn qorǵaý men memlekettik organdardyń jaýapkershiligin kúsheıtý.
– Ata zańnyń qaǵıdalary endi barlyq zańnamaǵa, quqyq júıesine jáne azamattardyń kúndelikti ómirine tikeleı yqpal etedi. Bul jańa zań qabyldaýmen qatar, qoldanystaǵy quqyqtyq ınstıtýttardy konstıtýtsııalyq qundylyqtarǵa sáıkestendirýdi talap etedi, – deıdi professor.
Sarapshynyń sózinshe, Konstıtýtsııanyń mańyzdy jańashyldyqtarynyń biri – memlekettik bıliktiń basty maqsaty azamatqa qyzmet etý ekenin naqtylaı túsýi. Osyǵan sáıkes azamattardyń quqyqtaryn qorǵaý tetikteri de edáýir kúsheıtilgen.
– Sonyń nátıjesinde memleket pen azamat arasyndaǵy qarym-qatynas jańa deńgeıge kóterilip, azamat ózin memlekettik apparattyń obektisi emes, quqyqtary Ata zańmen qorǵalǵan tolyqqandy quqyq sýbektisi retinde sezine alady, – deıdi Marat Asqaruly.
Professordyń pikirinshe, Konstıtýtsııanyń tıimdiligi ony qoǵamnyń qanshalyqty tereń túsinip, kúndelikti ómirde qoldana bilýine de baılanysty. Sondyqtan quqyqtyq mádenıetti qalyptastyrýǵa erekshe kóńil bólinýi qajet.
– Konstıtýtsııany barlyq bilim berý uıymdarynda oqytyp, onyń normalaryn qarapaıym ári túsinikti tilmen turaqty túsindirip otyrý mańyzdy. Ásirese, áleýmettik jelilerde, tsıfrlyq platformalarda jáne qoǵamdyq pikirtalastarda kúndelikti ómirden alynǵan mysaldar arqyly jastardyń quqyqtyq saýatyn arttyrý qajet. Azamat óz quqyqtaryn is júzinde qalaı qorǵaı alatynyn bilgende ǵana Konstıtýtsııanyń mán-mańyzyn tolyq sezinedi, – deıdi spıker.
Aıta keteıik, kúni keshe Prezıdent reformalardyń qanshalyqty nátıjeli bolǵanyn Quryltaıdyń aldaǵy qyzmeti aıshyqtaıtynyn aıtty.
1 shildede jańa Konstıtýtsııa kúshine endi. Ata zań aıasynda qabyldanatyn sheshimder men saıası reformanyń halyq ómirine áserin taldap jazǵan edik.
