Jańa Konstıtýtsııanyń erejeleri barlyq joǵary bilim berý baǵdarlamalarynyń mazmunyna enedi
ASTANA. KAZINFORM — Jańa Konstıtýtsııanyń erejeleri barlyq joǵary bilim berý baǵdarlamalarynyń mazmunyna engiziledi. Bul týraly Úkimet otyrysynda Ǵylym jáne joǵary bilim mınıstri Saıasat Nurbek aıtty.
— Jańa Konstıtýtsııa eldiń bolashaq arhıtektýrasynda jastardyń rólin kúsheıtý úshin qosymsha múmkindikter ashady. Ony bizdiń salamyz naqty túsinip Referendýmǵa daıyndyq kezinde joǵary oqý oryndary men ǵylymı-zertteý ınstıtýttary aýqymdy aqparattyq-túsindirý jumystaryn júrgizdi. Búkil el boıynsha myndaǵan kezdesýler, sarapshylyq pikirtalastar, dóńgelek ústelder men dıalog alańdary ótkizildi. Eń myqty zańger professorlarymyz, ýnıversıtet basshylary Konstıtýtsııalyq Komıssııa jumysyna belsendi qatysty, — dedi ol.
Mınıstrdiń aıtýynsha, Ál-Farabı atyndaǵy QazUÝ ǵalymdary «Qazaqstan Respýblıkasynyń jańa Konstıtýtsııasynyń jobasy: salystyrmaly taldaý» atty ádistemelik qural daıyndady. Bul quraldy búkil respýblıka boıynsha Jalpyulttyq koalıtsııa paıdalandy.
— Jańa Konstıtýtsııanyń normalary ǵylym men bilim berý máseleleri boıynsha tıisti zańnamalyq aktilerge engiziledi. Biraq bul — tehnıkalyq jumys. Uzaq merzimdi perspektıvada jańa Konstıtýtsııa normalary memlekettiń damýyndaǵy jáne bolashaq arhıtektýrasyn qalyptastyrýdaǵy negizgi ıdeologııalyq platforma sanalady. Sondyqtan jańa Konstıtýtsııanyń erejeleri barlyq joǵary bilim berý baǵdarlamalarynyń mazmunyna engiziledi. Arnaıy jalpy bilim berý pánderi aıasynda Áleýmettik-saıası bilim modýli engiziletin bolady, — dedi Saıasat Nurbek.
Aıta keteıik, Úkimet jańa Konstıtýtsııa normalaryn júzege asyrý joldaryn talqylap jatyr.
