Jańa Konstıtýtsııany iske asyrý úshin barlyq quqyqtyq baza qalyptasty — Ádilet mınıstri
ASTANA. KAZINFORM — Qazaqstanda jańa Konstıtýtsııanyń tolyqqandy kúshine enýine qajetti barlyq normatıvtik-quqyqtyq baza qalyptastyryldy. Bul týraly Úkimet otyrysynda Ádilet mınıstri Erlan Sársembaev málimdedi.
Mınıstrdiń aıtýynsha, Konstıtýtsııa memlekettik bılik júıesin túbegeıli jańartty. Ol «Kúshti Prezıdent — yqpaldy Quryltaı — esep beretin Úkimet» formýlasyna negizdelgen.
Tamyz aıynda Quryltaıǵa saılaý ótip, memlekettik bılik júıesi tolyqtaı qaıta qurylady. Konstıtýtsııany zańnamalyq turǵydan iske asyrý jumysy kezeń-kezeńimen júrgizilýde.
— Konstıtýtsııany iske asyrý jónindegi el Prezıdentiniń Jarlyǵyna sáıkes, alǵashqy kezeńde zańdardyń 9 «toptamasy» qabyldandy. Atap aıtqanda, 5 derbes konstıtýtsııalyq zań qabyldandy. Qoldanystaǵy 9 konstıtýtsııalyq zań, 15 kodeks jáne 51 zań jańa Konstıtýtsııaǵa tolyqtaı sáıkes keltirildi. Nátıjesinde memlekettik ınstıtýttardyń qyzmetine jáne Quryltaıǵa saılaýdy ótkizýge qajetti quqyqtyq negiz qalyptastyryldy, — dedi Erlan Sársembaev.
Bir mezgilde memlekettik organdar kóptegen zańǵa táýeldi normatıvtik quqyqtyq aktilerge tıisti ózgerister engizdi.
— Osylaısha, Konstıtýtsııanyń tolyqqandy kúshine enýine qajetti barlyq normatıvtik-quqyqtyq baza qalyptastyryldy. Kelesi kezeń — jańa konstıtýtsııalyq qundylyqtar men qaǵıdattarǵa súıene otyryp, búkil quqyqtyq júıeni keshendi túrde damytý. Bul baǵyttaǵy jumys bastaldy, — dedi Ádilet mınıstri.
Úkimet bekitken Konstıtýtsııany túsindirý jónindegi is-sharalar jospary aıasynda memlekettik organdar qoldanystaǵy zańnamaǵa keshendi taldaý júrgizýde.
Mysaly, Qazaqstan Respýblıkasynyń azamattyǵyn alý, tsıfrlyq ortada derbes derekterdi qorǵaý jáne memlekettiń áleýmettik saıasatyn jetildirý boıynsha jańa tásilder ázirlenip jatyr. Basty mindetterdiń biri — Konstıtýtsııaǵa engizilgen novellalardy Ádiletti Qazaqstan prızmasy aıasynda iske asyrý.
— Keshe Parlament sessııasynyń jabylýynda Memleket basshysy shynaıy ádiletti qoǵam — ıgilikti teń dárejede bólý emes, ol — ár azamatqa teń múmkindikter jasaýǵa baǵyttalǵan tıimdi júıe ekendigin atap ótti. Osyǵan baılanysty Memleket basshysy norma shyǵarý protsesine jańa kózqaraspen qarap, boljamdyq taldaýǵa, quqyqtyq jáne ekonomıkalyq saldarlarǵa súıený qajettigine erekshe nazar aýdardy. Atalǵan tezısterdi eskerip, Quryltaı qalyptasqansha saılaý kezeńinde memlekettik organdar zańnamany odan ári jetildirý boıynsha barlyq qajetti tásilderdi ázirleıdi, — dedi sala mınıstri.
Aıta keteıik, búgin jańa Konstıtýtsııa kúshine endi. Jalpyhalyqtyq referendým nátıjesinde qabyldanǵan tarıhı qujat memlekettik basqarý júıesin, qoǵamnyń damý baǵytyn túbegeıli ózgertpek.
Prezıdent qazaqstandyqtardy Jańa Konstıtýtsııanyń kúshine enýimen quttyqtady.
Sondaı-aq Premer-Mınıstr Oljas Bektenov barlyq memlekettik jáne qoǵamdyq ınstıtýttardy túbegeıli jańǵyrtý bastalǵanyn aıtqan edi.
